Tags-Shaam

ruḳh-e-teġh se jo na ho kabhī sahar aisī koī nahīñ mirī
nahīñ aisī ek bhī shaam jo tah-e-zulf-e-dār basar na ho

dhaḌak rahā hai sar-e-shām hī se dil kam-baḳht
visāl-e-yār kī sub.h aa ga.ī to kyā hogā

lauT aa.egā kisī shaam yahī lagtā hai
jagmagā.eñge dar-o-bām yahī lagtā hai

hai shām-e-hijr aaj o zālim o falak
gardish vo kar ki shaam se aa kar sahar mile

zulmat-e-shām-e-avadh sub.h-e-banaras kā nikhār
aagre ke taaj kī azmat himāla kā vaqār

shaam tak bhī jab koī niklā na daana Dālne
aañkh bhar bhar kar muñDeroñ se parinde uḌ ga.e

khulne ko hai qafas kā dar paane ko hai sukūñ nazar
ai dil-e-zār shām-e-ġham ham ko rulā chukī bahut

āsmāñ bhī nahīñ ro.egā lahū ke aañsū
maiñ agar shaam ke manzar se alag ho jā.ūñ

maiñ ne sūraj se dostī kī hai
shaam hote hī Dhal rahā huuñ maiñ

mujhe us sahar kī ho kyā ḳhushī jo ho zulmatoñ meñ ghirī huī
mirī shām-e-ġham ko jo luuT le mujhe us sahar kī talāsh hai

tāzgī daaġh kī har shaam ko be-hech nahīñ
aah kyā jaane diyā kis kā bujhāyā ham ne

har shaam yahāñ shām-e-vīrāñ āseb-zada raste galiyāñ
jis shahr kī dhun meñ nikle the vo shahr dil-e-barbād kahāñ

shaam se pahle tirī shaam na hone dūñgā
zindagī maiñ tujhe nākām na hone dūñgā

is karb kā aalam to musāfir hī se pūchho
jab shaam guzar jaatī hai aur ghar nahīñ aatā

qaid haiñ jin meñ shām-o-sahar
jis ne rakkhā qadam

sukūt-e-shām se kyuuñ nisbat-e-tabī.at hai
sukūt-e-shām se vaj.h-e-malāl pūchhūñgā

paanī kī tarah phail ga.ī ghar meñ shām-e-hijr
tā-sub.h Duub Duub ke ubhrā kare koī

zuhhād kī maalā nahīñ jo raat ko nikle
rindoñ kā piyāla hai sar-e-shām chalegā

yuuñ na piine meñ basar umr kī har shaam karo
shauq-e-rindī hai to saaqī se nazar aam karo

phir siyāhī ne sameTā mirā sāmān aa kar
kul asāsa mirā ik shaam kī zambīl meñ thā