Tags-Shaam

reza reza tire chehre pe bikhartī huī shaam
qatra qatra mirī palkoñ pe utartī huī shaam

maiñ bhī tanhā huuñ to ye shaam bhī tanhā tanhā
ya.anī tanhā.ī meñ kuchh aur nikhartī huī shaam

saath sāhil pe guzarte hue dekhī thī kabhī
yaad hai ab bhī samundar meñ utartī huī shaam

sub.h kā ḳhvāb magar ḳhvāb ajab jāñ-levā
mere pahlū meñ sisaktī huī martī huī shaam

lamha lamha mire hāthoñ se saraktā huā din
aur āseb-zada dil meñ utartī huī shaam

jī meñ hai yaad ruḳh-o-zulf-e-siyah-fām bahut
ronā aatā hai mujhe har sahar-o-shām bahut

din aatā thā aur siine meñ shaam kā ḳhāka bantā thā
shaam aatī thī aur jismoñ meñ shaam bhī āḳhir Dhaltī thī

guzartī shaam ke manzar pe raat hañs ke to dekh
mire lahū kā agar sho.ala-e-nihāñ niklā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

muñDer par koī chashm-e-tar thī ki aa.ina thā
sitāra-e-shām dekhtā thā makāñ kī jānib

kuchh is se pahle hī aa jaa.e merī ziist kī shaam
hayāt vaqf ho jab din shumār karne tak

jo zulfeñ mukhḌe pe khol detā sanam hamārā to phir ye gardūñ
na din dikhātā na shab batātā na sub.h laatā na shaam kartā

shaam chhat par utar ga.ī hogī
dard siine meñ bhar ga.ī hogī

'mazāq' miltī hai in rozoñ vaqt-e-shām sharāb
rakhe hai duḳhtar-e-raz ko siyām shīshe meñ

'sirāj' us kāba-e-jāñ ke tasavvur kuuñ kiyā sumran
yahī vird-e-sahar hai aur duā-e-shām ai vaa.iz

shām-e-alam bhī guzrī pahlū badal badal kar
rotā rahā hai ye dil pahroñ machal machal kar

aah ki khoyā gayā tujh se faqīrī kā raaz
varna hai māl-e-faqīr saltanat-e-rūm-o-shām

āñkheñ rakh diiñ us ne ghar ke darvāze par
shaam huī aur ḳhālī rasta vāpas aayā

ye Dhaltī shaam ye qaus-e-quzah kī rañg-āmezī
ye niile āsmāñ kī dilkashī meñ aks kis kā hai

sub.h-e-visāl thī to tabī.at thī baaġh baaġh
shām-e-firāq aa.ī to sañvlā ga.e haiñ ham