Tags-Shaam

abhī vo sub.h nahīñ hai ki merā kashf khule
vo harf-e-shām huuñ jo ajnabī zabān meñ hai

mah-o-ḳhurshīd ban kar āsmānoñ par hue raushan
do aañsū vo mirī āñkhoñ se jo shām-e-alam nikle

akele-pan kā 'azmī' ho bhī to ehsās kaise ho
tasalsul se hamārī shām-e-tanhā.ī safar meñ hai

ġham-e-hayāt ne āvāra kar diyā varna
thī aarzū ki tire dar pe sub.h o shaam kareñ

shaam bhī Dhal rahī hai ghar bhī hai duur
kitnī der aur maiñ rukūñ sāhab

afsurdagī-e-dard-e-farāqat hai sahar tak
ye shaam to ik shām-e-qayāmat hai sahar tak

har roz hoñge qatl ke sāmāñ na.e na.e
har shaam hogī shām-e-ġharībāñ kahā na thā

kahāñ mumkin tire ishrat-kade meñ shaam kāTeñ
abhī to sāmnā har gaam par afsos kā hai

phir is ke baad shab hai jis kī had sub.h-e-abad tak hai
muġhannī shaam kā naġhma sunā āhista āhista

sukūt-e-shām hai aur maiñ huuñ gosh-bar-āvāz
ki ek va.ade kā afsūñ sā hai fazāoñ meñ

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

ruḳhsat huā go daur-e-ḳhizāñ fasl-e-gul aa.ī
gulshan ke vahī haiñ sahar-o-shām abhī tak

go tābish-e-anvār se ḳhīra haiñ nigāheñ
hai sub.h ke ruḳh par asar-e-shām abhī tak

mahr ke mānind khātā charḳh phirtā huuñ ḳharāb
sub.h se ai mah-jabīñ tā-shām tere vāste

vo jis ne shaam ke māthe pe haath pherā hai
ham us charāġh-e-havā-sāz kā adab bhī kareñ

dayār-e-ġhair meñ shām-o-sahar aziyyat hai
dayār-e-dil meñ Thaharnā muhāl mere liye

hazār hāthoñ se maiñ ne jis ko sambhāl rakkhā thā zindagī meñ
charāġh-bar-kaf bisāt-e-dil par khaḌī huī hai vo shaam kahnā

andher thā nigāh-e-'amānat' meñ shaam sahar
tum chāñd kī tarah nikal aa.e kahāñ se aaj

dard hotā to sar-e-shām sambhal bhī jaatā
dil hai vo lashkar-e-armān ki jī jāntā hai

roz-e-mahshar to na thā shām-e-mulāqāt thī vo
yuuñ hue be-sar-o-sāmān ki jī jāntā hai