Tags-Shaam

phūlī hai shafaq go ki abhī shaam nahīñ hai
hai dil meñ vo ġham jis kā koī naam nahīñ hai

har taraf uḌne lagā tārīk sāyoñ kā ġhubār
shaam kā jhoñkā chamaktā shahar mailā kar gayā

svād-e-shām-e-mai-ḳhāna salāmat
bayāz-e-jāma-e-ehrām kyā hai

alam kī shaam aa ga.ī lo mere naam aa ga.ī
charāġh le ke raah meñ ai kaash mehrbāñ mile

koī 'nāsir' kī ġhazal koī zafar kī mai-tarañg
chāhiye kuchh to mirī shām-e-ayādat ke liye

javānī kī umañgoñ kā yahī anjām hai shāyad
chale aao ki va.ade kī suhānī shaam hai shāyad

ḳhvāb tere haiñ ye ḳhvāboñ kā nagar terā hai
zikr-e-anfās meñ har shām-o-sahar terā hai

shaam ko khulte haiñ dar aur kisī duniyā ke
raat ko fikr kā be-ant safar jāgtā hai

ayyām sirf shām-o-sahar ho ke rah ga.e
kaise ajiib log the ghar ho ke rah ga.e

vaa.e qismat dil lagāte hī judā.ī ho ga.ī
sub.h hote hī huī nāzil balā-e-shām-e-ishq

naqāb oḌh ke aa.e the raat ke qazzāq
pighaltī shaam se sab dhuup kā ḳhazāna gayā

vaqt kī barf hai har taur pighalne vaalī
din bhī hai zer-e-safar shaam bhī Dhalne vaalī

unhoñ ne sub.h aur shaam ke aḳhbār uThā.e
aur raddī vaale ko de diye

sūraj ko marte dekhūñ
vaqt barābar shaam likhūñ

ik shām-e-ḳhizāñ yahīñ kahīñ hai
ai sub.h-e-bahār yaad rakhnā

uThāo miinā ki shām-e-ġham ko sahar ke anvār se badal deñ
ye dāġh-e-hasrat to be-takalluf jalā kareñge jalā kiye haiñ

kidhar ko jā.ūñ nikal ke yā-rab ki garm-o-sard-e-zamāna mujh ko
dikhā.e hai shaam tak sahar se falak pe bijlī zamīñ pe bārāñ

ham kuuñ haiñ ehtimām karne vaale
har kaam meñ sub.h-o-shām karne vaale

apnī begam par hue shām-o-sahar ham yuuñ nisār
posTaroñ kī shakl meñ rassī pe laTkā hai vo pyaar