Tags-Shaam

pahāḌoñ se utartī shaam kī bechārgī dekheñ
daraḳhtoñ par laraz kar bujh rahī haiñ āḳhirī kirneñ

dīdanī haiñ chāhatoñ kī narm-o-nāzuk laġhzisheñ
gardish-e-ayyām meñ shām-o-sahar ke aas paas

sub.h se shaam tak bojh Dhotā huā
apnī hī laash kā ḳhud mazār aadmī

phuul ḳhushbū shaam sāvan shaġhl-e-paimāna chale
jis ko chalnā hai hamāre saath mai-ḳhāna chale

jo ho sake to vaqt kī zanjīr toḌ kar
shām-o-sahar kā paañv se chakkar nikāliye

kyoñ shaam lagā aa.ī vo surḳh tirī biñdī
aur hāthoñ meñ ye terī mehñdī bhī malī aa.ī

us kī ḳhudī hai abhī shām-o-sahar meñ asiir
gardish-e-daurāñ kā hai jis kī zabāñ par gila

apnā saaya DhūñD rahā huuñ
shaam hai pal-bhar tham jā dariyā

kuchh farq sā mahsūs nahīñ shām-o-sahar meñ
uThne ke tasavvur se thakan hone lagī hai

sub.h khiltā huā har phuul 'shamīm'
shaam aa.ī to bikhar jā.egā

shaam kā pahlā taara
dil ke ufuq par jis kī jot se

'āmir' kaisā din guzrā hai aur ye kaisī shaam huī
pahroñ ḳhuun Tapakte dekhā sūraj kī shiryānoñ se

vo ik va.ada-e-jām-e-sarshār-o-rañgīñ
vo ik shaam lekin hazāroñ savere

kholte haiñ jab apnī zulfāñ kuuñ
sub.h-e-āshiq kuuñ shaam karte haiñ

dekhā hai ye aksar shaam o sahar rah-rau to hai rah-rau ḳhud rahbar
har gaam pe khāte haiñ Thokar ma.alūm nahīñ kyā honā hai

gesū haiñ pareshāñ bulbul ke aur chaak girebāñ haiñ gul ke
panic meñ hai sabza shaam o sahar ma.alūm nahīñ kyā honā hai

luT gayā din kā asāsa aur baaqī rah ga.e
shaam kī dahlīz par laal o guhar TuuTe hue

fasl-e-bahār aa.ī hai chaltā hai daur-e-jām
muġh kī dukān shaam khule yā sahar khule

vahī chhāñv niim ke peḌ kī vahī shaam de ye fazā na de
ga.e mausamoñ kā asiir huuñ na.e mausamoñ kī sazā na de

aise hī kaam kiyā kartī hai gardish un kī āñkhoñ kī
shaam ko chāhe sub.h banā deñ sub.h ko chāhe shaam kareñ