Tags-Shaam

din ko us kā lahū thā arzāñ
phir aa.ī ye shām-e-ġharībāñ

sub.h tak karte rahe raushan diloñ se hamsarī
shaam se raushan nafas ho kar dhuāñ battī charāġh

ruup kī dhuup kahāñ jaatī hai ma.alūm nahīñ
shaam kis tarah utar aatī hai ruḳhsāroñ par

sahar kā kaam nahīñ mai-kade kī duniyā meñ
sahar kā naam na le lutf-e-shām le saaqī

ḳhabar na shām-e-ġharībī kī mujh ko thī 'nāsiḳh'
chhupī huī thī ye sub.h-e-vatan ke parde meñ

kis qadar dilkash suhānī shaam hai barsāt kī
bolne vaalī hai ab tasvīr goyā raat kī

sub.h kā dhokā huā hai shaam par
chāñd ko dekhā achānak baam par

mujh ko shaam batā detī hai
tum kaise kapḌe pahne ho

dekho charāġh-e-qabr use kyā javāb de
aa.egī shām-e-hijr mujhe pūchhtī huī

jo shaam hotī hai har roz haar jaatā huuñ
maiñ apne jism kī parchhā.iyoñ se laḌte hue

ḳhushk pattoñ pe chale jaise koī shām-e-ḳhizāñ
ab tirī yaad kā yuuñ jism pe pahrā hogā

aa.egī ek manzil be-shām-o-be-sahar
pinhāñ ye raaz gardish-e-shām-o-sahar meñ hai

guftugū suntā huuñ terī hī yahāñ shām-o-sahar
kuchh na kuchh mujh se tirā ḳhālī makāñ boltā hai

ilāhī shaam ab is gaañv meñ na aane paa.e
ki is ke aate hī dukhiyā.eñ mil ke rotī haiñ

tumhārī yaad kī chhāñv meñ din guzārā hai
tumhāre zikr ke saa.e meñ shaam kar aa.e

ġhārat-gar-e-sukūñ thiiñ navā-hā-e-ḳhūn-e-balb
jañgal kī shaam shahr meñ aa.ī to Dar ga.ī

sham-e-ummīd gar nahīñ hotī
shām-e-ġham kī sahar nahīñ hotī

jinheñ tire naam kī chaah hai ye zamīn un kī gavāh hai
vahīñ karbalā kā vo dasht hai vahīñ qasr-e-kūfa-o-shām hai

maiñ huuñ fasurda shaam kī afsurdagī hai aur
dhundlā sā aks-e-yār hai yādoñ kī bhaap par

ab āftāb-e-munavvar pe qurb-e-shām huā
ik aur saal mirī umr kā tamām huā