Tags-Shahr

ḳhūgar-e-shahr hue dīvāne
chāk-e-dāman bhī siyā hai ab to

kisī bhī raah se tum aa sako to aa jaanā
ki shahr merā hai saarī dishā.eñ merī haiñ

qadam qadam dukh dard ke saa.e shahr hue vīrāne bhī
kis ne des ke phūloñ par ab hijr kī raakh uḌaa.ī hai

shahr kā shahr hai be-zār kahāñ jā.ūñ maiñ
aur tanhā.ī hai dushvār kahāñ jā.ūñ maiñ

bahtā hai lahū shahr kī har ek galī meñ
āñkhoñ ko gulistāñ ke nazāre nahīñ milte

ek do sajde zarā shahr-e-nigārāñ kī taraf
ai ġham-e-hastī Thahar chaltā huuñ tere saath maiñ

tavāf-e-shahr-e-nigārāñ mirā hī jurm nahīñ
zan-e-havā bhī to āvāra kū-ba-kū hī rahī

hariyālī ko āñkheñ tarseñ bagiyā lahūluhān
pyaar ke giit sunā.ūñ kis ko shahr hue vīrān

ab jo chale to ye khulā shahr kushāda ho gayā
baḌh ga.e aur fāsle ghar se gharoñ ke darmiyāñ

vo jo apnī jaañ se guzar ga.e unheñ kyā ḳhabar hai ki shahr meñ
kisī jāñ-nisār kā zikr kyā koī sogvār bhī ab nahīñ

nahīñ ab to ahl-e-junūñ meñ bhī vo jo shauq-e-shahr meñ aam thā
vo jo rañg thā kabhī kū-ba-kū sar-e-kū-e-yār bhī ab nahīñ

ḳhush-qismat haiñ vo jo gaañv meñ lambī taan ke sote haiñ
ham to shahr ke shor meñ shab-bhar apnī jaan ko rote haiñ

dil kī dillī luT ga.ī is ke aivānoñ meñ ġhadar machī
ḳhuddārī ke muġhal shahzāde shahr meñ Thaliyā Dhote haiñ

ye hādsa bhī tire shahr meñ huā hogā
tamām shahr mujhe DhūñDhtā phirā hogā

sāneha hai ki hameñ luuTā gayā hai phir bhī
shahr luT jaane kā ilzām hamāre sar hai

is shahr meñ ġhārat-gar-e-īmāñ to bahut the
kuchh ghar kī sharāfat hī bachā le ga.ī ham ko

mujh se 'mansūr' kisī ne to ye pūchā hotā
nañge paañv maiñ tire shahr meñ kyā kartā huuñ

jaan kar gūñgā huuñ aur bahrā huuñ maiñ
is liye is shahr meñ zinda huuñ maiñ

ai 'dil' ajab vo shahr-e-sitam thā ki aaj tak
hai koī adh-khulā sā darīcha ḳhayāl meñ

ab maiñ kisī kī soch badalne se to rahā
ye shahr-e-bad-gumāñ mujhe shaidā kahe so huuñ