Tags-Shahr

jo dasht meñ bhī jalāte the fasl-e-gul ke charāġh
maiñ shahr meñ bhī vahī aable talāsh karūñ

kuchh bhūlī-bisrī yādoñ kā albelā shahr basāyā hai
koī vaqt mile to aa niklo yahīñ miltā huuñ yahīñ rahtā huuñ

shahr kī galiyāñ ghuum rahī haiñ mere qadam ke saath
aise safar meñ itnī thakan meñ kaise kaTegī raat

vo havā kā chupke se jhāñknā kisī bhūle bisre madār se
kahīñ ghar meñ shahr kī zulmateñ kahīñ chhat pe chāñd kirā.e kā

shahr kuchh chhūT ga.e gard-e-safar lipTī rahī
koī rūdād sunāne pe na pahuñchā āḳhir

shahr meñ ham ḳharāb hāloñ ne
haal apne ḳharāb beche haiñ

bānu-e-shahr-e-adab ke liye is ahd meñ harf
kitnā be-māyā-o-mahrūm-e-sadāqat utrā

na dasht o dar se alag thā na jañgaloñ se judā
vo apne shahr meñ rahtā thā phir bhī tanhā thā

kyā hogā sar-e-shām jo ham hoñge na ghar meñ
ye soch ke ham shahr se hijrat nahīñ karte

kahāñ se uThte haiñ bādal kahāñ baraste haiñ
hamāre shahr kī āñkhoñ meñ ik savāl sā hai

bulā rahā hai koī shahr-e-ārzū se hameñ
magar ye paañv zamīñ meñ gaḌe hue haiñ kahīñ

udāsiyāñ haiñ jo din meñ to shab meñ tanhā.ī
basā ke dekh liyā shahr-e-ārzū maiñ ne

jise bhī dekho vahī ajnabī sā lagtā hai
tumhāre shahr meñ koī bhī āshnā na milā

ban gayā marja.a-e-ḳhalā.iq-e-dasht
shahr kī is qadar fazā bigḌī

ye shahr-e-ham-nafasāñ kitnī baar ujḌā hai
kabhī na ho sakā lekin sar-e-hayāt nigūñ

shahr ke hālāt se do-chār ho kar aa ga.e
dākuoñ ke beach ab darbān rahne ke liye

tamām-shahr hī havā ke dosh par savār hai
dikhā.e koī zaḳhm kyā sunā.e koī haal kyā

jab se is shahr-e-be-makān meñ huuñ
maiñ tire ism kī amaan meñ huuñ

tulū-e-sub.h kī kirneñ bahut hī ḳhuub haiñ lekin
jamāl-e-shahr-e-dil vaqt-e-sahar kuchh aur hotā hai

ġharīb-e-shahr kā kyā is ko ġhurbat maar Dālegī
amīr-e-shahr ko daulat kī chāhat maar Dālegī