Tags-Shahr

buuñd paanī ko mirā shahr taras jaatā hai
aur bādal hai ki dariyā pe baras jaatā hai

ho chukī bū-e-vafā shahr se ruḳhsat kab kī
koī din hai ki phaloñ meñ se bhī ras jaatā hai

tum bhare shahr meñ kis Dhañg se rahte ho 'nasīm'
goyā vīrāne meñ jā kar koī bas jaatā hai

is shahr-e-kaj-kulāh ke āsār dekhnā
aur ḳhud ko be-ridā sar-e-bāzār dekhnā

masnad-nashīn-e-shahr-e-ḳharābāt kaun ho
kis se sambhal sakegī ye dastār dekhnā

jis meñ ġharīb-e-shahr kī beTī chunī ga.ī
ai mere shahr-e-yār vo dīvār dekhnā

ḳhizr guzre the shahr se apne
ham bhī the ek rāh-bīnoñ meñ

faiz-e-shahr-e-'anīs' se 'sālik'
sher kahte haiñ in zamīnoñ meñ

vahī ās.māñ hai vahī fazā vahī nashsha shaam pe hai bapā
vahī duur shahr se hai jagah vahī sabz farsh hai ghaas kā

tamām shahr hī dushman hai kyā kiyā jaa.e
vafā ke naam se bad-zan hai kyā kiyā jaa.e

qalam ho jaa.e sar parvā na karnā
amīr-e-shahr ko sajda na karnā

tamām shahr ko kyuuñ chup lagī hai kyā jāneñ
ghuTan diloñ meñ ye kaisī hai kyā kahā jaa.e

sher meñ nasr meñ dāstānoñ meñ tū
shahr o sahrā meñ tū aur chaTānoñ meñ tū

us bevafā kā shahr hai aur vaqt-e-shām hai
aaise meñ aarzū baḌī himmat kā kaam hai

is shahar meñ jiine kī hai ab ek hī sūrat
ehsās ke mansūr ko suulī pe chaḌhā do

shahr ko chhoḌ ke vīrānoñ meñ ābād to ho
tujhe tanhā.ī kī āvāz sunā.ī degī

yuuñ to sadā-e-zaḳhm baḌī duur tak ga.ī
ik chārāgar ke shahr meñ jā kar bhaTak ga.ī

rotī rahī lipaT ke har ik sañg-e-mīl se
majbūr ho ke shahr ke andar saḌak ga.ī

añdherī raat nauhe gā rahī hai
ḳhamoshī shahr bhar meñ chhā rahī hai

lene vaalā hī koī baaqī nahīñ thā shahr meñ
varna to us shaam koī dar-ba-dar paiġhām thā