Tags-Shahr

shahr-e-nā-pursāñ meñ kuchh apnā pata miltā nahīñ
bām-o-dar raushan haiñ lekin rāsta miltā nahīñ

ghar ke dukhḌe shahr ke ġham aur des bides kī chintā.eñ
in meñ kuchh āvāra kutte haiñ kuchh ham ne paale haiñ

tum divāne ho ye sach hai ise taslīm karo
ham nahīñ kahte faqat shahr meñ sab kahte haiñ

haiñ is ḳharāb dil se mash.hūr shahr-e-ḳhūbāñ
is saarī bastī meñ ghar vīrān hai hamārā

'faisal' jo shahr aap hī mismār ho gayā
kyā ilm kab se hamd-o-sanā ke baġhair thā

amīr-e-shahr hai bechain shaiḳh ḳhauf-zada
abhī talak ye adāvat hai ya.anī ham abhī haiñ

bahut bechain hai ḳhāk-e-bayābāñ sar paTaktī hai
divāna shahr bhar meñ be-amāñ kaisā rahā hogā

haañ isī raste meñ hai shahr-e-nigār-e-ārzū
aap chalte jā.iye mere lahū kī dhaar par

hirs ke tūfān meñ Dhah jā.eñge saare mahal
shahr meñ darvesh kī ik jhoñpaḌī rah jā.egī

jī meñ aatā hai ham banā Dāleñ
shahr se duur ek ghar tanhā

zulm par kyā zabān kho leñge
shahr ye aaj be-navā.ī hai

safar nasīb jo sahrāoñ ke musāfir haiñ
vo log shahr meñ kis tarah ab qayām kareñ

gaañv kī pagDanDiyoñ se shahr tak
chehra chehra bokhalāhaT aur maiñ

is shahr kā har jhūTā ḳhudā dekh rahā hai
haqdār kī dastār kā kaTh-putlī tamāshā

ḳhāmosh ho raho ki sar-e-shahr-e-ārzū
uftād vo paḌī hai ki ab kyā batā.eñ ham

'nasīm' duzdī-e-mazmūñ na chhoḌeñge sho.arā
agarche shahr kā tabdīl kotvāl huā

ek vo log ki sahrāoñ ko raunaq baḳhsheñ
ek ham haiñ ki bhare shahr bhī vīrāne haiñ

āj-kal josh pe ye dīda-e-tar rahtā hai
mardum-e-shahr ko tūfān kā Dar rahtā hai

har ek haath meñ patthar kahāñ se ā.eñge
tamām shahr to barham dikhā.ī detā hai

mufāhamat mirī koshish supurdagī tirā kaam
tū apne shahr-e-junūñ kā mujhe rivāj batā