Tags-Shahr

shahr meñ jab bhī zuleḳhā se ḳharīdār aa.e
kitne yūsuf the ki ḳhud hī sar-e-bāzār aa.e

'betāb' aaj DhūñDne nikleñ kidhar amaañ
ab shahr shahr ban chukā bastī balāoñ kī

dasht kī ḳhaak huā jism to kab kā 'ḳhāvar'
shahr meñ ab bhī mirā naam magar baaqī hai

huī thī zindagī jab shahr meñ gum
kisī ko koī rañj is kā nahīñ thā

ham itnī duur kahāñ the ki phir palaT na sakeñ
savād-e-shahr se koī sadā nahīñ aa.ī

aap kis kis ko bhalā suulī chaḌhāte jā.eñge
ab to saarā shahr hī mansūr bantā jaa.e hai

vo aisā kaun hai jis se bichhaḌ kar
ḳhud apne shahr maiñ tanhā huā huuñ

jo tere shahr ko gulgūñ bahār baḳhsh gayā
qadam qadam ba-sar-e-nok-e-ḳhār guzrā thā

shahr kī is bhiiḌ meñ chal to rahā huuñ
zehn meñ par gaañv kā naqsha rakhā hai

tab dāḳhila milegā tujhe dasht-e-husn meñ
jab ahl-e-shahr kahne lageñ tujh ko ġhair ġhair

kisī lab pe harf-e-sitam to ho koī dukh supurd-e-qalam to ho
ye bajā ki shahr-e-malāl meñ koī 'faiz' hai koī 'mīr' hai

kisī ḳhamoshī kā zahr jab ik mukālme kī tarah se chup thā
ye vāqi.a hai ki shahr-e-qātil bujhe diye kī tarah se chup thā

jis shahr bhī ham jaise barbād-e-nazar jaa.eñ
aurāq musavvir ke tasvīr se bhar jaa.eñ

bigḌī huī is shahr kī hālat bhī bahut hai
jā.ūñ bhī kahāñ is se mohabbat bhī bahut hai

mujh se ye pūchh rahe haiñ mire ahbāb 'azīz'
kyā milā shahr-e-suḳhan meñ tumheñ shohrat ke sivā

dayār-e-'dāġh'-o-'beḳhud' shahr-e-dehlī chhoḌ kar tujh ko
na thā ma.alūm yuuñ ro.egā dil shām-o-sahar tujh ko

is mohr-e-ḳhamoshī meñ nihāñ rūh-e-takallum
is so.e hue shahr kī hai apnī zabāñ bhī

kuchh paane kuchh kho dene kā dhoka hai
shahr meñ jo phirte haiñ maare maare log

shahr-e-badan bas rain-baserā jaisā hai
manzil par kab rukte haiñ banjāre log

ḳhūb-rū tamannā.eñ ḳhush-libās ummīdeñ
shahr-e-dil kī bastī bhī kyā hasīn bastī hai