Tags-Shahr

na ho jo shahar kī mānind būd-o-bāsh nahīñ
yahī bahut hai ki sahrā meñ ham amaan se haiñ

pyaas is shahr kī bujhne kā yahī rasta hai
ban ke bādal kisī darvesh kī chhāgal barse

lag ga.ī kis kī nazar shahr-e-nigārāñ ko mire
ab to har shaam yahāñ vahshat-e-maqtal barse

ai ġhazālī āñkhoñ vaalī
sunā hai tumhāre shahr meñ chaa.e achchhī miltī hai

jānte haiñ ki ujaḌ jā.eñge ham andar se
mānte haiñ ki tumheñ shahr se jaanā paḌegā

galiyoñ kī udāsī pūchhtī hai ghar kā sannāTā kahtā hai
is shahr kā har rahne vaalā kyuuñ dūsre shahr meñ rahtā hai

is taraqqī ko aur kyā kahiye
shahr se sidq kī galī gum hai

ye āñdhiyāñ haiñ to shahr-e-vafā kī ḳhair nahīñ
zamāna ḳhāk-fishāñ hai qarīb aa jaao

faqīh-e-shahr kī majlis nahīñ ki duur raho
ye bazm-e-pīr-e-muġhāñ hai qarīb aa jaao

kyuuñ 'majāz' aap ne sāġhar toḌā
aaj ye shahr meñ charchā kyā thā

vo shor-o-ġhul vo shahr kā tūfān-e-zindagī
achchhe rahe vahī jo bayābāñ meñ aa ga.e

phir nahīñ aane kā ḳhvāboñ meñ tire
shahr se tere agar jā.ūñgā maiñ

tumhāre dukh ne
mere andar ek shahr-e-mātam daryāft kiyā

jaanā dekh aanā kuchh rañg abhī bahtā hogā
shahr ke chaurāhe meñ kal ik ḳhvāb huā qurbān

shādmānī meñ ġham ke tūfāñ meñ
raunaq-e-shahr meñ bayābāñ meñ

na qadr-dāñ, na koī ham-zabāñ, na insāñ dost
fazā-e-shahr se behtar haiñ ab to vīrāne

dil meñ us shahr ke kuchh aks abhī baaqī haiñ
luT ga.e ham bhī jahāñ garmi-e-bāzār ke saath

tirā shahr shahr-e-ajīb hai yahāñ kaun hai jo ġharīb hai
koī kah rahā hai falak mirā koī kah rahā hai zamīñ mirī

maiñ sochtā huuñ ji.eñ bhī to kis liye 'fāriġh'
ki ab to shahr meñ pahlī sī aabrū bhī nahīñ

sach to ye hai ki mire paas hī dirham kam haiñ
varna is shahr meñ is darja girānī bhī nahīñ