Tags-Shahr

vālī-e-shahr naġhmoñ kā qātil bajā par hameñ ġham hai kyā
fikr zinda ho jab tak mire shā.iro aas martī nahīñ

tamām shahr meñ bikhrā paḌā hai merā vajūd
koī batā.e bhalā kis tarah chunūñ ḳhud ko

ye shahr hai anjān kahāñ raat guzārūñ
hai jān-na-pahchān kahāñ raat guzārūñ

tū mujhe tañg na kar a dil-e-āvāra-mizāj
tujh ko is shahr meñ laanā hī nahīñ chāhiye thā

ik aa.ina bhī huuñ aur aks bhī huuñ
ki shahr-e-sañg kā rah-gīr huuñ maiñ

ye rañg tire shahr ke sahrā meñ kahāñ haiñ
galiyāñ haiñ na kūche haiñ makīñ haiñ na makāñ haiñ

mujh pe patthar pheñkne vāloñ ko tere shahr meñ
narm-o-nāzuk haath bhī dete haiñ patthar toḌ kar

parda-e-shab kī oT meñ zohra-jamāl kho ga.e
dil kā kañval bujhā to shahr tīra-o-tār ho ga.e

ghuTan ko kar liyā apnā muqaddar
makāñ ko shahr se ūñchā uThā kar

shahr-e-vafā meñ ham ne sab kuchh luTā diyā hai
ye baat un se kahnā logo sambhal sambhal kar

us shahr meñ kitne chehre the kuchh yaad nahīñ sab bhuul ga.e
ik shaḳhs kitāboñ jaisā thā vo shaḳhs zabānī yaad huā

tamām shahr ko hai jis pe naaz ai 'jauhar'
ik aisā shaḳhs hamāre nagar meñ rahtā hai

apnā qusūr hai to ye, aur koī ḳhatā nahīñ
ham ne faqīh-e-shahr ko maanā kabhī ḳhudā nahīñ

rahte haiñ shahr-e-sañg meñ shīshe kā dil liye
logo hamārā jazba-e-īsār dekhnā

mumkin hai garebānoñ meñ ḳhanjar bhī chhupe hoñ
tū shahr-e-amāñ meñ bhī na be-ḳhauf phirā kar

vo qaht-e-ziyā hai ki mire shahar ke kuchh log
jugnū ko liye phirte haiñ muTThī meñ dabā kar

ek ujḌī huī hasrat hai ki pāgal ho kar
bain har shahr meñ kartī huī dekhī ga.ī hai

har samt ḳhamoshī hai magar kahte haiñ kuchh log
is shahr meñ ik shor qayāmat kā bapā hai

ye shahr-e-dillī bahisht-e-nazar jo thā kal tak
banā huā hai jahannam zamīñ se tā-ba-falak

tamām shahr pe chhā.ī huī hai ik vahshat
nazar jhapakte hī kaisī badal ga.ī hālat