Tags-Shahr

chalī shahr meñ vo havā-e-zar ki ġhubār ban ke ga.e bikhar
vo jo ḳhvāb āñkhoñ meñ the makīñ vo junūñ jo apne saroñ meñ the

mire muhsinoñ meñ haiñ shahr ke ye tavīl-o-āshnā rāste
kahīñ aur jaa.e amaañ na thī ki ġhanīm-e-jāñ to gharoñ meñ the

vahī jin kī teġh se ban gayā mirā shahr maqtal-e-ḳhūñ-fishāñ
sar-e-ām dīda-e-nam liye vahī log nauhagaroñ meñ the

ye dil hai yā kisī āfat-rasīda shahr kī raat
ki jitnā shor thā utnā sukūt taarī hai

shahr ne pūchhā gaañv kā
us ko kyā batlā.ūñ maiñ

shahr kyā duniyā badal kar dekh lo
phir kahoge ham to ab uktā ga.e

hazār baar tasavvur ke shahr se guzrā
vo ek sher jo dīvān meñ nahīñ aayā

ye shab to kyā sahar ko bhī shāyad nahīñ patā
maiñ āḳhirī charāġh huuñ sūraj ke shahr kā

pahle har dar pe rakhe sho.ala-bayānī ke diye
jal uThā shahr to phir aag bujhāne nikle

na khul paayā kabhī bāb-e-mohabbat kam-nasīboñ par
fasīl-e-shahr-e-jānāñ se ka.ī sar phoḌ aa.e haiñ

mire ahbāb saare shahr meñ haiñ
maiñ apne gaañv meñ kyā kar rahā huuñ

kuchh dinoñ to shahr saarā ajnabī sā ho gayā
phir huā yuuñ vo kisī kī maiñ kisī kā ho gayā

ishq kar ke dekhiye apnā to ye hai tajraba
ghar mohalla shahr sab pahle se achchhā ho gayā

shahr-e-havas ke saudā.ī ḳhud jin kī rūheñ nañgī haiñ
mere tan kī uryānī par āvāze kyuuñ kaste haiñ

is bhare shahar meñ kartā huuñ havā se bāteñ
paañv paḌtā hai zamīñ par mirā aahū kī tarah

shahr meñ aa kar bhī ham apnī miTTī kab bhūle
faḳhr hameñ hai ai 'ḳhālid' ke ham dehātī haiñ

kaaTī hai umr raat kī pahnā.iyoñ ke saath
ham shahr-e-be-charāġh meñ ai be-kasāñ rahe

ye kis ḳhayāl kī parchhā.īñ thī muñDeroñ par
tamām shahr ko mahv-e-qayās chhoḌ ga.ī

kaise ā.īne ke mānind chamaktā huā maiñ
ishq ke shahr-e-abad-tāb meñ aayā huā huuñ

shahr ujḌe to kyā hai kushāda zamīn-e-ḳhudā
ik nayā ghar banā.eñge ham sabr kar sabr kar