Tags-Shahr

har taraf uḌne lagā tārīk sāyoñ kā ġhubār
shaam kā jhoñkā chamaktā shahar mailā kar gayā

shahr meñ saare charāġhoñ kī ziyā ḳhāmosh hai
tīrgī har samt phailā kar havā ḳhāmosh hai

patthar le kar saarā shahr hai us ke pīchhe
ik pāgal ne sab ko pāgal kar rakkhā hai

phir kabhī lauT kar na ā.eñge
ham tirā shahr chhoḌ jā.eñge

shahr-e-dil kī tumheñ ābādī kā kuchh bhī hai ḳhayāl
yā jahāñ rahiyegā vīrāñ hī vahāñ kījiyegā

merī jānib se kaho mohtasib-e-shahr se ye
sa.ī-e-arzānī-e-mai az dil-o-jāñ kījiyegā

is shahr ke logoñ meñ nahīñ quvvat-e-bardāsht
ye shahr to saarā hī fasādī hai chalā jā

tamām shahr ik tasvīr ban gayā thā 'shahāb'
ajiib diid kā manzar thā us ke jaate hī

phaile haiñ saare shahr meñ qisse ajiib se
guzrā hai jab bhī phuul sā chehra qarīb se

mirā shahr mujh pe gavāh hai ki har ek ahd-e-siyāh meñ
vo charāġh-e-rāh-e-vafā huuñ maiñ ki jalā to jal ke bujhā nahīñ

shahar meñ dhañstā hai fitne kī na.ī daldal meñ
kyā qayāmat hai ki merā hī pata māñge hai

ye aur baat terī galī meñ na aa.eñ ham
lekin ye kyā ki shahr tirā chhoḌ jaa.eñ ham

kaun is shahar meñ suntā hai fuġhān-e-durvesh
apnī āshufta-bayānī se rulā.eñ kis ko

taaza vārid huuñ miyāñ aur ye shahr-e-dil hai
kuchh kamāne ko yahāñ kār-e-ziyāñ DhūñDtā huuñ

dhuup ke shahr mirī jaañ se lipaT kar ro.e
sard shāmoñ kī taraf maiñ thā nikalne vaalā

lageñ dene sabaq vo phir parindoñ ko uḌānoñ kā
zarā se shahr meñ jab chīñtiyoñ ke par nikal aa.e

pahle to apne paañv zamīñ se judā hue
phir yuuñ huā ki shahr-badar ho ke rah ga.e

tum bhī is shahr meñ ban jāoge patthar jaise
hañsne vaalā yahāñ koī hai na rone vaalā

jab merī gavāhī bhī mire haq meñ nahīñ
phir shahr meñ kis kis kī shahādat dī jaa.e

kise ḳhabar vo ravāna bhī ho sakā ki nahīñ
tumhāre shahr se jab us kā āb-o-dāna gayā