Tags-Shajar

hamārā kyā hai hamārī sochoñ ko noch khā.eñge ye parinde
hamārī chaupāl ke shajar ko ġhulām dīmak nigal ga.ī hai

har phuul ek zaḳhm thā har shāḳh ek laash
goyā ki raah meñ thiiñ salībeñ shajar na the

husn kho kar āshnā ham se huā vo naunihāl
pahuñche tab zer-e-shajar ham jab samar jaatā rahā

jo aaj phir se mire bāl-o-par nikal aa.e
to terī raah ke kaTvā diye shajar maiñ ne

kyā jāniye kaisī thī vo havā chauñkā na shajar patta na hilā
baiThā thā maiñ jis ke saa.e meñ 'manzūr' vahī dīvār girī

jo shajar sahn meñ lagā hai 'arsh'
us pe chiḌiyā chahak rahī hogī

dikhā.ī detā hai sūraj bhī kuchh pareshāñ sā
udaas maiñ hī nahīñ huuñ kisī shajar ke liye

ik aas to hai koī sahārā nahīñ to kyā
raste meñ kuchh shajar to haiñ saaya nahīñ to kyā

ye ik shajar ki jis pe na kāñTā na phuul hai
saa.e meñ us ke baiTh ke ronā fuzūl hai

sūraj kā phuul abr ke pattoñ meñ gum rahā
shab ke shajar kā saaya rahā mujh udaas par

ab saaya o samar kī tavaqqo kahāñ ruke
sūkhe hue shajar haiñ sar-e-rahguzār log

shajar lagā.e haiñ maiñ ne ye kam nahīñ e.azāz
mire nasīb meñ 'rūhī' samar nahīñ na sahī

hijr sāmāñ hai ravāñ sū-e-shab-e-vasl 'shahāb'
dhuup oḌhe hue zer-e-shajar aatā hai koī

har taraf log chhāñv ke dushman
aur shajar sāya-dār hai sāhab

tamām laala o gul ke charāġh raushan haiñ
shajar shajar pe shagūfoñ meñ jal rahī hai havā

phir ek shāḳh-e-zard girī ḳhaak ho ga.ī
phir barg-e-nau mile shajar-e-māh-o-māl ko

samar kisī kā ho shīrīñ ki zahr se kaḌvā
mujhe haiñ jaan se pyāre sabhī shajar apne

javāñ rutoñ meñ lagā.e hue shajar apne
nishān sabt raheñge Dagar Dagar apne

jahāñ meñ kis ko gavārā huī hai fikr kī dhuup
har ik, koī shajar-e-sāya-dār māñge hai

sabz qabā-e-chaman sirf fareb-e-nazar
aas kī koñpal kisī shāḳh-e-shajar meñ nahīñ