Tags-Shajar

ik tirā ġham thā ba-har-rañg jo shādāb rahā
is shajar ne na girāyā koī pattā apnā

shajar ke qatl meñ is kā bhī haath hai shāyad
batā rahā hai ye bād-e-sabā kā chup rahnā

ba-faiz-e-bār-e-malāmat jhukī kamar merī
harā shajar thā magar shahr-e-be-samar meñ thā

idhar bhī aa.eñ kabhī dhuup ke satā.e hue
shajar khaḌe haiñ sar-e-rāh sar jhukā.e hue

haT ga.ī chhāñv magar log vahīñ baiThe haiñ
dasht kī dhuup meñ jaane vo shajar kaisā lagā

bekalī baḌh ga.ī hai dariyā kī
kah gayā jhuk ke kuchh shajar shāyad

jis shajar par samar nahīñ hotā
us ko patthar kā Dar nahīñ hotā

jame hue haiñ ye shāḳhoñ pe is tarah jaise
shajar ke saath ugaa.e hue parinde haiñ

na.ī duniyā na.e manzar na.e afkār mile
sab shajar naql-e-makānī ke samar-bār mile

chāroñ taraf the dhuup ke jañgal hare-bhare
sahrā meñ koī mere alāva shajar na thā

yahāñ rāste bhī haiñ be-shajar hai munāfiqat bhī yahāñ hunar
mujhe apne aap pe faḳhr hai ki maiñ kāmyāb nahīñ rahā

ye dasht-e-shauq kā lambā safar achchhā nahīñ lagtā
magar Thahrūñ kahāñ koī shajar achchhā nahīñ lagtā

abhī ravāna huuñ yaksūī se maiñ dasht-ba-dasht
ki rahguzār-e-safar meñ shajar ziyāda nahīñ

shajar to kab kā kaT ke gur chukā hai
parinda shāḳh se lipTā huā hai

jamhūriyat kā dars agar chāhte haiñ aap
koī bhī sāya-dār shajar dekh lījiye

dhuup dhuup chal kar bhī jab thake na ham-rāhī
kaise apnī ḳhātir maiñ sāya-e-shajar māñgūñ

shajar-e-tar na yahāñ barg-e-shanāsā koī
is qarīne se sajāyā hai ye manzar kis ne

bāñdh de shāḳhoñ se tū miTTī ke phal kāġhaz ke phuul
ye taqāzā raah meñ ujḌe shajar karne lage

kyā ho gayā gulshan ko sākit hai fazā kaisī
sab shāḳh o shajar chup haiñ hiltā nahīñ pattā bhī

dil ke shajar ne kis mehnat se
ik ik shāḳh harī rakkhī hai