Tags-Shajar

phal koī haath kyuuñ nahīñ aatā
qad meñ mujh se shajar baḌā hai kyā

khā ke patthar bhī jo muskān bikhere har-sū
bāġh-e-ālam kā vo phaldār shajar ho jaa.e

kitnā bhī rañg-o-nasl meñ rakhte hoñ iḳhtilāf
phir bhī khaḌe hue haiñ shajar ik qatār meñ

dhuup kī tez tapish aur safar hai dar-pesh
sā.ebāñ koī yahāñ hai na shajar sāmne hai

tamām umr diyā maiñ ne apnā ḳhūn-e-jigar
milā na mujh ko koī sāya-e-shajar phir bhī

bār-e-samar se shāḳh-e-shajar jhuk ga.ī to kyā
maiñ be-samar thā phir bhī jhukāyā gayā mujhe

sabz rakkhā hai jise maiñ ne lahū de ke 'qamar'
mehrbāñ dhuup meñ āḳhir vo shajar kab hogā

parind kyuuñ na uḌā.īñ hañsī añdheroñ kī
mire shajar kī abhī Daal Daal raushan hai

dasht-e-ġham aur har shajar tanhā
raat soī hai be-ḳhabar tanhā

chhāleñ shajar shajar se utarne ko aa ga.iiñ
bosīda pairahan huā itnā ki phaT gayā

sañg-reze to baraste haiñ mire āñgan meñ
jis kā har phal hai rasīlā vo shajar terā hai

maiñ jis kī shāḳh pe chhoḌ aayā āshiyāñ apnā
ye sochtā huuñ ki ab vo shajar bhī hai ki nahīñ

phir be-numū zamīn thī aur ḳhushk the shajar
be-abr āsmāñ kā chalan kāmyāb thā

havā chalī to pasīna ragoñ meñ baiTh gayā
namī kā zahr shajar kī jaḌoñ meñ baiTh gayā

kab dīda-e-gul huā dāman jo jab chhoḌ ga.ī gul ko ḳhushbū
kab aayā shajar ko hosh-e-numū jab pattā pattā TuuT gayā

'arsh' bahāroñ meñ bhī aayā ek nazāra patjhaḌ kā
sabz shajar ke sabz tane par ik sūkhī sī Daalī thī

ik shajar ke koī do patte bhī ik jaise na the
merī duniyā meñ kisī shai kā koī saanī nahīñ

phir fazāoñ meñ suḳhan gholne bādal aa.e
phir chalī tez havā aur shajar bol paḌā

phir parinde shajar se bichhḌe haiñ
phir se tasvīr-e-yās hai koī

niind meñ Duube shajar se chīḳhte panchhī uḌe
ḳhauf ke maare havā meñ kapkapī sī ho ga.ī