Tags-Shajar

huā ke ruḳh se pur-ummīd thā bahut gulshan
par ab ke bhī shajar be-samar nasīb huā

bulandiyoñ kī havas meñ jo sab ko chhoḌ ga.e
kab un parindoñ ko apnā shajar nasīb huā

ḳhulūs ho to duā meñ asar bhī aatā hai
shajar harā ho to us meñ samar bhī aatā hai

maiñ in se TuuT ke kartā huuñ pyaar kyuuñ na karūñ
ye saare phuul ye patte mire shajar hī ke haiñ

tarāshiye to ka.ī pattharoñ ke sīnoñ meñ
shajar kī shāḳhoñ ke mānind naqsh phaile haiñ

havā hai tez sambhālegā in meñ kitnoñ ko
shajar kā hausla patte shajar ke dekhte haiñ

ham jā ke kahāñ bādiya-paimā hue 'mohsin'
jis dasht meñ sabza na kahīñ koī shajar thā

be-navā patte bhī āyāt-e-numū paḌhte hue
tum ne dekhā hai kabhī shāḳh-e-shajar kā jāgnā

ek taa.ir kī vāpsī na huī
sabz mausam shajar se TuuT ga.e

ai Dāliyoñ pe na.e phal ugāne vaalī duā
mire shajar ko bhī is hālat-e-ḳhizāñ se nikāl

duur tak koī nahīñ hai shajar-e-sāya-dār
chand sūkhe hue peḌoñ kī qatāroñ ke sivā

rutoñ meñ ek rut yahāñ shajar bhī kāTne kī thī
pata chalā jab apne ghar kā pāsbān kho diyā

āh-e-sozāñ ne jalā.e tire jañgal 'sayyāh'
naam ko bhī na rahā ek shajar meñ tinkā

log kahte the ki phaltā nahīñ nafrat kā shajar
ham ko lagtā hai ki is daur meñ phal saktā hai

gul-o-shajar par hai murdanī sī fazā pe chhāyā huā hai mātam
ye tujh ko kyā ho gayā hai bulbul jo aaj naġhma-sarā nahīñ hai

vo jis tarah se parinde shajar pe lauTte haiñ
ham apne aap se nikle tujhī meñ lauT aa.e

shabnam-e-tāza hai ye phuul haiñ yā pate haiñ
dekh shāḳh-e-shajar-e-shām se jhaḌtā kyā hai

magar ye kaun badaltī huī rutoñ se kahe
shajar meñ saaya nahīñ hai shajar to ab bhī hai

ajiib dard kā rishta thā sab ke sab ro.e
shajar girā to parinde tamām shab ro.e

ḳhushk miTTī meñ milī hai phir na.e mausam kī baas
phir shajar nikhre baraste pāniyoñ ke darmiyāñ