Tags-Shama

sham.a meñ soz kī vo ḳhū hai na parvāne meñ
jo hai ai barq-shamā.il tire dīvāne meñ

añdherī raat havā tez barshgāl kā shor
karūñ to kaise karūñ sham.a kī nigahbānī

hādisa hai lekin aisā ġhair-ma.amūlī nahīñ
sham.a par parvāna jalne de koī parvāna kar

jī jhoñktā hai koī ātish meñ nāhaq apnā
jalte haiñ sham.a par jo parvāne bāvle haiñ

mujh qabr se yaar kyūñke jaave
hai sham-e-mazār kyūñke jaave

nahīñ dam mārne kā dam aur us par
sarāpā sham.a saañ shakl-e-zabāñ huuñ

imkān-e-asar par sham.a-e-duā
bujhne kī adā kā naam rahī

yaar duniyā ke sāñche meñ Dhalte rahe sham.a fānūs the ham pighalte rahe
apnī tanhā-ravī apnā soz-e-darūñ ham bhī duniyā meñ ik mājrā ho ga.e

mānind-e-sham.a baiTh ke tai kī rah-e-adam
yaaro mojaza hai ki raftār dekhnā

shab ko tum ham se ḳhafā ho kar sahar ko uTh ga.e
sham.a saañ ro ro ke ham bhī dil jigar ko uTh ga.e

āḳhirī sham.a huuñ maiñ bazm-e-vafā kī logo
chāhe jalne do mujhe chāhe bujhā do mujh ko

āḳhir-e-shab zabān-e-sham.a pe hai
dāstān-e-hujūm-e-tanhā.ī

maiñ to huuñ sham-sifat-soz sarāpā 'shiblī'
jis ko jalnā nahīñ aatā ho vo parvāna bane

huī sub.h-e-pīrī kaTī ab javānī
ye jalnā faqat sham.a-sāñ shab kī shab hai

ik raat bhī hañsā nahīñ us sham.a-rū se maiñ
aañsū mire gale ke hue haar be-sabab

ārzu-e-hūr kyā ho 'nāz' dil de kar unheñ
sham.a par kyā aañkh Dāleñ māh-e-kāmil dekh kar

dil diyā hai ham ne bhī vo māh-e-kāmil dekh kar
zard ho jaatī hai jis ko sham-e-mahfil dekh kar

sham.a kī lau tez itnī thī dhuāñ honā hī thā
fā.ede ke kaam meñ kuchh to ziyāñ honā hī thā

tirī bazm-e-ḳhud-ġharaz ne ka.ī rañg badle lekin
maiñ harīf-e-sham.a ban kar usī tarah jal rahā huuñ

niklī zabān-e-sham.a se kyā baat raat ko
sunte hī jis ko bazm meñ parvāna jal gayā