Tags-Shama

ġhamoñ kī aañch meñ tap kar hī fan nikhartā hai
ye sham.a jaltī hai 'jāved' chashm-e-pur-nam se

raat parvāne ke mātam meñ gudāz-e-dil se
sham.a kī ashk-fishānī hai kaho yā na kaho

tere aage sham.a dharī thī
sham.a ke aage ik saayā thā

hayāt lau tah-e-dāmān-e-marg de uTThī
havā kī raah meñ ye sham.a jal to saktī hai

ma.āl-e-soz-e-ġham-hā-e-nihānī dekhte jaao
bhaḌak uTThī hai sham-e-zindagānī dekhte jaao

diid ke qābil tamāshā thā ye hañgām-e-sahar
sham.a kā har saañs mahv-e-mātam-e-parvāna thā

rañg laayā hai barā-e-dīda-e-anjām jo
sham.a har har zarra-e-ḳhāk-e-par-e-parvāna thā

diloñ ko ab bhī chamkātī hai sham-e-ārzū terī
lab-e-tahrīr par ab tak hai shīrīñ guftugū terī

tūfān-e-ġham kī tund havāoñ ke bāvajūd
ik sham-e-ārzū hai jo ab tak bujhī nahīñ

Darā.egī hameñ kyā hijr kī añdherī raat
ki sham.a baiThe haiñ pahle hī ham bujhā.e hue

us sham.a-rū ne apne shahīdoñ kī juuñ patañg
gaḌne na diiñ zamīn meñ lāsheñ jalā.iyāñ

jhilmilātī hai sar-e-bazm-e-jahāñ sham-e-ḳhudī
jo ye bujh jaa.e charāġh-e-rah-e-irfāñ ho jaa.e

hāsil-e-bazm hai parvāne kī raakh
raat bhar sham.a kā charchā kyuuñ thā

sho.ala-e-ishq us pe hue raushan
sham.a saañ dil kuuñ jo gudāz kare

lau ko chhūne kī havas meñ ek chehra jal gayā
sham.a ke itne qarīb aayā ki saayā jal gayā

har sho.ala-gar-e-ahd-e-zulmat anjām se apne Dartā hai
jab zikr-e-sahar mahfil meñ chhiḌā kuchh sham.a kī lau tharrā hī ga.ī

nazar bujhī to mile raushnī kahāñ 'hashamī'
jalā ke sham.a bahut aañkh se lagā.ī bhī

ai sham.a ahl-e-bazm to baiThe hī rah ga.e
kahne kī thī jo baat vo parvāna kah gayā

jab sar-e-shām koī yaad machal jaatī hai
dil ke vīrāne meñ ik sham.a sī jal jaatī hai