Tags-Shama

ye jalā vo bujh ga.ī aur baat maggham rah ga.ī
sham.a kahnā chāhtī thī apne parvāne se kyā

havā ḳhafā thī magar itnī sañg-dil bhī na thī
hamīñ ko sham.a jalāne kā hausla na huā

din añdheroñ kī talab meñ guzrā
raat ko sham.a jalā dī ham ne

gumrāh zamāna hai to kyā ġham?
sham-e-mah-o-sāl de rahā huuñ

jiine ke vāste koī sūrat to chāhiye
ho sham-e-anjuman ki dhuāñ kuchh na kuchh to ho

shab sham.a par patañg ke aane ko ishq hai
us dil-jale ke taab ke laane ko ishq hai

apnī hastī nazar aa.ī thī abhī
saañs se sham.a bujhā.ī thī abhī

agar sham.a hue to gal ga.e ham
jo parvāna hue to jal ga.e ham

is qadar sahl kahāñ marhala-e-soz-o-gudāz
raat bhar sham.a kā jalnā bhī koī baat huī

chāroñ taraf hai sham-e-mohabbat kī raushnī
parvāne DhūñD DhūñD ke laa.ī jidhar mile

hameñ bhī hove ijāzat ki sham.a-rū tujh par
patañg kī namat ik dam tū ās-pās phireñ

tum ko marnā hai to marnā mire gul hone par
sham.a kahtī rahī shab-bhar yahī parvāne se

murda hai dil to gor hai siina
daaġh sham-e-mazār sā hai kuchh

sham.a kī sūrat qismat bhī
jalte hī bujh jaatī hai

siikh le pahle ujāloñ kī hifāzat karnā
sham.a bujh jaa.e to āñdhī se shikāyat mat kar

gul sham-e-anjuman hai go anjuman vahī hai
hubb-e-vatan vahī hai ḳhāk-e-vatan vahī hai

sham-e-adab na thī jab yūnāñ kī anjuman meñ
tābāñ thā mahr-e-dānish is vādī-e-kuhan meñ

na sāz-o-mutrib na jām-o-sāqī na vo bahār-e-chaman hai baaqī
nigāh-e-sham-e-sahar ke parde ye naqsha-e-anjuman hai baaqī

ai sham-e-bazm-e-yār vo parvāna kaun thā
lau meñ tirī ye daaġh hai jis kī vafāt kā

kisī mahfil meñ jis dam zikr-e-sham-e-tūr hotā hai
dikhā dete haiñ vo jal kar sar-añgusht-e-hinā.ī ko