Tags-Shama

ye sham-e-ishq hai bujhne na paa.e
abhī ham jaise parvāne bahut haiñ

aas hī se dil meñ paidā zindagī hone lagī
sham.a jalne bhī na paa.ī raushnī hone lagī

na pūchhiye ki shab-e-hijr ham pe kyā guzrī
tamām raat jale sham-e-anjuman kī tarah

sham.a ke mānind ham is bazm meñ
chashm-e-tar aa.e the dāman-tar chale

kiyā andher zālim ne bujhā kar sham-e-ulfat ko
umīdoñ kī sahar ko shām-e-hijrāñ ban ke luuTā hai

tauqīr añdheroñ kī baḌhā dī ga.ī shāyad
ik sham.a jo raushan thī bujhā dī ga.ī shāyad

ik sham-e-ārzū kī haqīqat hī kyā magar
tūfāñ meñ ham charāġh jalā.e hue to haiñ

sham-o-parvāna shab ko the dil-soz
rah ga.e sub.h tak vo jal-bhun ke

ik sham.a sar-e-rāh jalī ḳhair huī
tashvīsh kī hājat na rahī ḳhair huī

sham.a bhī to ho rahī hotī hai har pal rā.egāñ
kyuuñ faqat ham ko nazar aatā hai parvāne kā dukh

ho gar na vo sham.a-rū hī to phir
kyā aag lagā.ūñ dūd-māñ ko

dostī bandagī vafā-o-ḳhulūs
ham ye sham.a jalānā bhuul ga.e

raat Dhaltī rahī ham sisakte rahe
sham.a aañsū bahātī rahī rāt-bhar

shikva-e-zulmat-e-shab se to kahīñ behtar thā
apne hisse kī koī sham.a jalāte jaate

na sham.a kāñpī na giit Duube uThe jo ham un kī anjuman se
chalo bas achchhā huā ki aise kahāñ ke mahfil-faroz the ham

sham.a hai lekin dhuñdlī dhu.dlī
saayā hai lekin raushan raushan

muddat se koī aayā na gayā sunsān paḌī hai ghar kī fazā
in ḳhālī kamroñ meñ 'nāsir' ab sham.a jalā.ūñ kis ke liye

parvāne kī ḳhaak pareshāñ sham.a kī lau bhī larzāñ larzāñ
mahfil kī mahfil hai vīrāñ kaun kare ab kis kā mātam