Tags-Shama

junūñ baġhair kabhī āgahī nahīñ hotī
jale na sham.a to kuchh raushnī nahīñ hotī

sham.a ik mom ke paikar ke sivā kuchh bhī na thī
aag jab tan meñ lagā.ī hai to jaan aa.ī hai

sham-e-taraf jalāne se pahle hī dekh lo
ye dasht-e-nā-murādī-e-dil kā diyā na ho

ham rū-ba-rū-e-sham.a haiñ is intizār meñ
kuchh jaañ paroñ meñ aa.e to uḌ kar nisār hoñ

jo sham-e-bazm-e-suḳhan kabhī the na koī ab un ko jāntā hai
davām jin ko huā na hāsil vo shohrateñ kyā shumār karnā

is ehtimām se parvāne peshtar na jale
tavāf-e-sham.a kareñ aur kisī ke par na jale

shaam hote hī koī sham.a jalā rakhnī thī
jab darīche se havā aatī to dekhā jaatā

asar-e-ishq se huuñ sūrat-e-sham.a ḳhāmosh
ye muraqqa.a hai mirī hasrat-e-goyā.ī kā

sham.a insāniyat ke nūr-faroġh
zulmat-e-infi.āl meñ gum haiñ

haañ sham.a kā maiñ gul huuñ nāseh kī guftugū huuñ
baḌh jā.ūñgā jahāñ tak mujh ko ghaTā.iyegā

ḳhudā ThanDā rakhe ai sham.a tujh ko
khaḌī rotī hai bekas ke sirhāne

kis bazm meñ dekhī hai vo jhamkī ki maiñ 'qā.em'
juuñ sham.a sadā mahv-e-pareshāñ-nazarī huuñ

juuñ sham.a dam-e-sub.h maiñ yaañ se safarī huuñ
Tuk muntazir-e-jumbish-e-bād-e-saharī huuñ

ye intizār nahīñ sham.a hai rifāqat kī
is intizār se tanhā.ī ḳhūb-sūrat hai

mānind-e-sham.a girya hai kyā shuġhl-e-turfa-tar
ho jaatī raat us meñ balā se basar to hai

ḳhaak aur ḳhuun se ik sham.a jalā.ī hai 'nushūr'
maut se ham ne bhī sīkhī hai hayāt-ārā.ī

vo kisī kī yaad meñ jaltī huī sham-e-firāq
ḳhud bhī pighlegī mirī āñkhoñ ko bhī pighlā.egī

marne ke ba.ad phir nahīñ koī sharīk-e-hāl
jaatā hai sham-e-kushta ko parvāna chhoḌ kar