Tags-Shama

mirī namāz ''nazar'' shaiḳh kī namāz ''alfāz''
yahāñ charāġh vahāñ sirf sham-e-kushta kā duud

jalā rahī thī havā bazm-e-jāñ meñ sham-e-tarab
miTā rahī thī sabā lauh-e-dil se naqsh-e-jumūd

kyuuñ tīrgī se is qadar mānūs huuñ 'zafar'
ik sham-e-rah-guzār ki sahar tak jalī bhī hai

bekas ko kaun ro.e ġharīboñ kā kaun hai
merī lahad pe sham.a huī ashk-bār kab

Tuk dekh sanam-ḳhāna-e-ishq aan ke ai shaiḳh
juuñ sham-e-haram rañg jhalaktā hai butāñ kā

maqdūr nahīñ us kī tajallī ke bayāñ kā
juuñ sham.a sarāpā ho agar sarf zabāñ kā

un ke jaate hī kyā huā dil ko
sham.a sī jhilmilā.ī jaatī hai

soz-e-dil kā zikr apne muñh pe jab laate haiñ ham
sham.a saañ apnī zabāñ se aap jal jaate haiñ ham

apne pājāma-e-kam-ḳhvāb kī har boTī ko
sham.a-rū shab ko charāġh-e-tah-e-dāman samjhā

kah kar tamām raat ġhazal sub.h ke qarīb
'āzād' misl-e-sham-e-sahar huuñ bujhā huā

terā aanā thā tasavvur meñ tamāshā sham.a-rū
mere dil par raat parvānoñ kā balvā ho gayā

sham.a ne bazm meñ jal jal ke jalāyā āḳhir
aah kyā hashr huā ishq meñ parvāne kā

hañsne kā tarīqa paidā kar rone kā salīqa paidā kar
hañs phuul kī sūrat gulshan meñ ro sham.a kī sūrat mahfil meñ

bekasī kā to jalā dil mirī turbat pe 'hafīz'
kyā huā vo na agar sham.a jalāne aa.e

auhām kī tārīkī to miTā sakte haiñ jalā kar sham.a-e-ḳhirad
lekin ḳhud aql ke zā.ida auhām se bachnā mushkil hai

sham-e-sozāñ kuchh ḳhabar bhī hai tujhe o mast-e-ġham
husn-e-mahfil hai jabhī jab tak ki parvāna rahe

huī hai sham.a gul ab pyaar vaalī
jaleñ kaise diye ab zindagī ke

shola bhaḌke na kyuuñ ki mahfil meñ
sham.a tujh bin havā se laḌtī hai

shab-bhar hai faroġh-e-sho.ala ai 'shād'
hañgām-e-sahar hai sham.a kā kuuch

parvāna jalā to sham.a bolī
terā hai udhar idhar mirā kuuch