Tags-Shama

be-kār kabhū raat ko bhī maiñ nahīñ rahtā
juuñ sham.a mujhe tā-ba-sahar mashq-e-fanā hai

siyāh paḌne lagegī sham-e-visāl kī zau
khilā huā rāt-bhar jo rañg-e-hinā rahegā

sham.a phīkī raat kam mahfil udaas
ab muġhannī kā tarāna aur hai

jo dil kī aag se vāqif baneñ vo kyā jaane
lipaT ke sham.a se kyuuñ jal rahe haiñ parvāne

shab-e-tār kā fasāna kabhī muḳhtasar bhī hogā
koī sham.a to jalāo koī jaam to uThāo

kitnī raushan kyuuñ na ho 'āzād' āḳhir ek din
sham-e-hastī maut ke jhoñkoñ se gul ho jā.egī

aap ko jaate na dekhā jā.egā
sham.a ko pahle bujhāte jā.iye

aa.ī bujhne ko apnī sham-e-hayāt
shab-e-ġham kī magar sahar na huī

sham.a nāzāñ hai faqat sar se bhaḌak jaane meñ aag
phūñk de saarā jahāñ haigī vo parvāne meñ aag

sho.ala-e-sham-e-haram husn-e-butāñ se hai ḳhajil
mujh ko ḳhatra hai ki lag jaa.e na but-ḳhāne meñ aag

ḳhāk-e-parvāna le uḌī mahfil
sham.a ko intizār kis kā hai

bujh ga.ī sham-e-junūñ luT ga.ī bazm-e-yārāñ
ahl-e-dil sozish-e-jāñ hotī hai kyā bhuul ga.e

jal gayā baaġh magar sham-e-numū-ḳhez kī lau
sabz hai har shajar-e-soḳhta-sāmāñ meñ kahīñ

lau lagātā na kisī ġhair se ai sham-e-husn
tum ne gar apnā hī parvāna banāyā hotā

sham.a kī lau kyā shauq-e-baqā meñ sham.a ko chāTe jaatī hai
ḳhud ko tarastī rah jaatī hai ruuh miTā ke badan apnā

tujh pe gudāz dil hai sarāpā ai sham.a-rū
juuñ naḳhl-e-mom baaġh meñ har ik daraḳht thā

falāh-e-ḳhalq meñ uThte haiñ nā-gahāñ tūfāñ
dhaḌak rahā hai havāoñ meñ sham-e-rāh kā dil

raqs farmāne lage sab ranj-o-ġham soz-o-alam
sham-e-mīnā jal uThī tāsīr raushan ho ga.ī

husn bhī kambaḳht kab ḳhālī hai soz-e-ishq se
sham.a bhī to rāt-bhar jaltī hai parvānoñ ke saath