Tags-Shama

sub.h tak sham.a sar ko dhuntī rahī
kyā patiñge ne iltimās kiyā

parvānoñ kī raakh uḌā dī bād-e-sahar ke jhoñkoñ ne
sham.a banī hai paikar-e-mātam dekhne vaale dekhtā jā

kasāfat-e-zindagī kī zulmat meñ sham-e-haq zau-fishāñ ho kaise
jahāñ kī bujhtī huī nigāhoñ ko jagmagātā hai bām-e-nānak

ham nahīñ sham.a hoñ jo ashk-fishāñ
kār-e-ushshāq jāñ-fishānī hai

sar kaTā.eñge sham.a saañ ḳhāmosh
gar yahī apnī be-zabānī hai

parvāna-e-havā-o-havas haañ barā.e-shauq
koī maqām sham-e-vafā se alag-thalag

mohabbat raushnī kā ek lamha hai magar chup hai
kise sham-e-tamannā de kise dāġh-e-judā.ī de

chamkā tirā jamāl jo mahfil meñ vaqt-e-shām
parvāna be-qarār huā sham.a jal ga.ī

dekhnā ban ke parvāna aaoge tum
sūrat-e-sham.a ḳhud ko jalā.eñge ham

detā hai kaf se daulat-e-pā-bos sham.a kī
ro degā sar pe dhar ke phir āḳhir patañg dast

kitnī tire mazār pe chhā.ī hai bekasī
ik sham.a ashk-rez thī vo bhī ḳhamosh hai

ho bar-afroḳhta ba-sūrat-e-sham.a
shakl-e-parvāna meñ jalā dekhā

jis kā gorā rañg ho vo raat ko khiltā hai ḳhuub
raushnā.ī sham.a kī phīkī nazar aatī hai sub.h

sham.a jab majlis se mah-rūoñ kī letī hai uThā
kyā kahūñ kyā kyā suneñ us vaqt dikhlātī hai sub.h

jiye jaate haiñ shakl-e-sham-e-sozāñ
na kuchh baaqī raheñge ham sahar tak

vo sham-e-shab-afroz thī parvāna jahāñgīr
ye baat bhī donoñ kī mohabbat se ayaañ thī

thā huur kā TukḌā but-e-tannāz kā mukhḌā
ik sham.a thī fānūs meñ jo nūr-fishāñ thī

huuñ maiñ parvāna magar sham.a to ho raat to ho
jaan dene ko huuñ maujūd koī baat to ho