Tags-Shama

tasavvur meñ jamāl-e-rū-e-tābāñ le ke chaltā huuñ
añdherī raah meñ sham-e-farozāñ le ke chaltā huuñ

ḳhushā iqbāl-e-rañjūrī ayādat ko tum aa.e ho
faroġh-e-sham-e-bālīñ tāla-e-bedār-e-bistar hai

bose ke daaġh se hai munavvar jabīñ magar
jaltī paḌī hai sham.a sī pyāsī zabāñ janāb

'sirāj' ab ghar tirā raushan huā hai
magar vo sham.a-rū mehmān pahuñchā

abr-e-naisāñ ye tunuk-baḳhshī-e-shabnam kab tak
mere kohsār ke laale haiñ tahī-jām abhī

sham.a kī tarah koī ġham-gusār kyā hogā
saath saath chaltī hai raat raat bhar ḳhāmosh

dil-e-jūñ-sham.a bahr-e-dāvat-e-nazzāra lāya.anī
nigah labrez-e-ashk o siina ma.amūr-e-tamannā ho

na dekheñ rū-e-yak-dil sard ġhair-az sham-e-kafūrī
ḳhudāyā is qadar bazm-e-'asad' garm-e-tamāshā ho

larzāñ tarsāñ bar-sar-e-mizhgāñ ḳhuun ke aañsū haiñ 'tāriq'
sham-e-farozāñ shahr meñ le kar ḳhūnī manzar dekhā hai

ham ek umr jale sham-e-rahguzar kī tarah
ujālā ġhairoñ se kyā māñgte qamar kī tarah

rah-e-tārīk-e-zalālat meñ pa.e ḳhalq-e-ḳhudā
sham-sā mazhar-e-anvār gurū-nānak the

ghar meñ dīpak hī jalā hai na koī sham-e-vafā
muddatoñ dil hī jalā hai tire jaane ke baad

zindagī sham.a kī mānind jalātā huuñ 'nadīm'
bujh to jā.ūñgā magar sub.h to kar jā.ūñgā

tum achchhe masīhā ho davā kyuuñ nahīñ dete
be-nūr jo hai sham.a bujhā kyuuñ nahīñ dete

muddat se koī aayā na gayā sunsān paḌī hai ghar kī fazā
in ḳhālī kamroñ meñ 'nāsir' ab sham.a jalā.ūñ kis ke liye

hameñ to sham.a ke donoñ sire jalāne haiñ
ġhazal bhī kahnī hai shab ko basar bhī karnā hai

manzil-e-sham.a tak āsān rasā.ī ho jaa.e
is liye ḳhaak patañgoñ kī uḌā dete haiñ

aur pītal kā ye zahrīlā saañp
jis kī nāzuk sī zabāñ par ye ḳhunuk sham.a kī lau

ḳhvāb kī bastī meñ afsāne kā ghar
sham.a kī lau par hai parvāne kā ghar

ajab nahīñ ki sar-e-shahr-e-ārzū 'nādir'
hamārā dil bhī jale sham-e-anjuman kī tarah