Tags-Shama

shab-e-firāq hai sham-e-umīd le aao
koī charāġh jalāo ki ġham kī raat kaTe

chaman meñ haiñ baham parvāna o sham.a o gul o bulbul
ijāzat ho to maiñ bhī hāl-e-dil apnā bayāñ kar luuñ

sham o parvāna na mahfil meñ hoñ bāham zinhār
sham.a-rū ne mujhe bheje haiñ ye parvāne do

kahtā thā koī sham.a-ruḳh dekh mire charāġh-e-shab
koī kiran bachā ke rakh roz-e-siyāh ke liye

yaad lāvegā kabhī to mujh kuuñ yaar
sham.a bin parvāna par kam hovegā

partav-fagan huā jo ruḳh-e-qibla-e-anām
mash.hūr ho ga.ī vo zamīñ arsh-ehtishām

aaj to sham.a havāoñ se ye kahtī hai 'salām'
raat bhārī hai maiñ bīmār ko kaise chhoḌūñ

gum huī jab andheroñ meñ rāh-e-vafā ham ne sham-e-junūñ se ujālā kiyā
jab na paa.ī koī shakl-e-baḳhiya-garī ham ne kāñToñ se zaḳhmoñ ke muñh sī liye

zulmat-e-ġham jab ziyāda ho 'imām'
sham-e-fikr-o-fan jalāyā kījiye

āsmāñ ik din patiñgā ho sar-e-sham-e-zamīñ
mom kar apne lahū ko jal aziyyat se na Dar

ham-sarī kī qad-e-mauzūñ o ruḳh-e-raushan se
chor kī tarah diyā sham.a ko laTkā ulTā

jalā vo sham.a ki āñdhī jise bujhā na sake
vo naqsh ban ki zamāna jise miTā na sake

sham.a raushan jism-e-fānūs-e-ḳhayālī meñ hai aaj
ruuh juuñ misl-e-magas makḌoñ kī jaalī meñ hai aaj

sham.a bujhtī hai to duniyā meñ sahar hotī hai
ai suḳhan-var tirā āġhāz hai anjām tirā

dareġh āh-e-sahar-gah kār-e-bād-e-sub.h kartī hai
ki hotī hai ziyāda sard-mehrī sham.a-rūyāñ kī

kahūñ kyā garm-joshī mai-kashī meñ sho.ala-rūyāñ kī
ki sham-e-ḳhāna-e-dil ātish-e-mai se farozāñ kī

jal rahī hai dil meñ sham-e-ārzū
ġham-kade meñ raushnī hai āj-kal

yaaro maiñ kyā kahūñ ki jalā kis tarah patañg
pūchho zabān-e-sham.a se us kī lagan kī baat

sham-e-bazm-e-adab thā vo kal tak magar
aaj 'lāġhar' charāġh-e-sahar sā lage

bahut din ba.ad kuchh an-dekhe ḳhvāb utre haiñ āñkhoñ meñ
siyah ḳhāne meñ kyā kyā sham.a raushan kar rahā huuñ maiñ