Tags-Shama

'sirāj' us sham.a-rū ne in dinoñ meñ
liyā hai sab patañgoñ kā ijārā

din ko phirte haiñ tujhe DhūñDne aur raat tamām
sham.a kī tarah se ro ro ke sahar karte haiñ

sham.a-sāñ barsar-e-mahfil na jalā dekh mujhe
phail jā.ūñgā sitamgar jo pighal jā.ūñgā

mujh se kahtā hai mirā dūd-e-jigar sūrat-e-sham.a
dil meñ rokoge to maiñ sar se nikal jā.ūñgā

nafas-e-qais ki hai chashm-o-charāġh-e-sahrā
gar nahīñ sham-e-siyah-ḳhāna-e-lailī na sahī

pighal kar dil lahū ho ho ke bah jaatā hai āñkhoñ se
sitam hai sham.a ko jo zīnat-e-mahfil samajhte haiñ

na nazdīk āñkhoñ ke kījiye sham.a ko
nahīñ to kaheñge daġhā de rahī hai

pur-soz jigar ke naale bhī dil-soz nikalte rahte haiñ
haañ sham.a bhī jaltī rahtī hai parvāne bhī jalte rahte haiñ

sho.ale uThte haiñ baar baar ajiib
kaun hai sham.a-vār ā.ankhoñ meñ

'sirāj' us shola-rū kī tañg poshī kuuñ kahāñ pahuñche
ki hai jaama badan meñ sham.a ke fānūs kā Dhailā

na ho jo zindagī anjām vo vijdān-e-nāqis hai
huzūr-e-shamm'a bād-e-vajd parvāne pe kyā guzrī

jaane kis sub.h kī tamannā meñ
rāt-bhar sham.a saañ jalā hai koī

mauqūf kar is bazm meñ ye charb-zabānī
ai sham.a tū kaTvā.e hai kyuuñ apnī zabāñ ko

sab pe raushan hai ki rāh-e-ishq meñ mānind-e-sham.a
paañv par se ham ne qurbāñ rafta rafta sar kiyā

gul huī sham.a to dāman bhaḌak uTThā 'hashamī'
jab nazar bujh ga.ī vīrānī hī vīrānī thī

bujhī bujhī sī rahe sham-e-ārzū sar-e-bazm
so raushnī ke liye dil jalā diyā ham ne

kab ye dil o dimāġh hai minnat-e-sham.a khīñchiye
ḳhāna-e-dil-jaloñ ke biich dāġh-e-jigar charāġh hai

dam-e-tauf kirmak-e-sham.a ne ye kahā ki vo asar-e-kuhan
na tirī hikāyat-e-soz meñ na mirī hadīs-e-gudāz meñ

maiñ vo bashar ki mujh se har aadmī ko nafrat
tum sham.a vo ki tum par parvāne aadmī haiñ

dafn jab ḳhaak meñ ham soḳhta-sāmāñ hoñge
fils maahī ke gul-e-sham-e-shabistāñ hoñge