Tags-Sharab

ai 'qalaq' mai-kade meñ sajde kyuuñ
kaun degā pa-e-savāb sharāb

maryamī uḌ ga.ī masīhā kī
lab-e-nāzuk pe hai sharāb sharāb

zaa.e.a auqāt ko nahīñ karte
piite haiñ vaqt-e-māhtāb sharāb

har ghaḌī zikr-e-mai hai ai vaa.iz
ho ga.ī terī to kitāb sharāb

pī bhī ai māya-e-ashabāb sharāb
garm-joshī se hai kabāb sharāb

ba.ad-azīñ mohtasib qasam le le
tauba kartā huuñ lā shitāb sharāb

us kī baḳhshish hai be-hisāb agar
ham bhī piite haiñ be-hisāb sharāb

bahr-e-har-zarf-e-imtihāñ sāġhar
har tamannā kā intiḳhāb sharāb

mus.haf-o-ḳhirqa bechte haiñ ham
ho ga.ī jaan ko azaab sharāb

paate haiñ mai-kade meñ 'baqā' ne.amat-e-sharāb
ḳhum se sab subū subū se qadah aur qadah se ham

saaqī na hove paas tū kab jur.a-e-sharāb
shīshe ke le gulū se qadah aur qadah se ham

ham intizār kareñ ham ko itnī taab nahīñ
pilā do tum hameñ paanī agar sharāb nahīñ

bahut pīr-e-muġhāñ zī-hausla hai
sharāb-e-nāb ke sāġhar luTe haiñ

haiñ ahl-e-nazar yahāñ pe sabhī ġhalat koī kaam ho na sake
sharāb-e-kuhan vo pī ke chale jo mast-e-ḳhirām ho na sake

kisī hasīna ke bosoñ ke qābil ab na rahe
to in laboñ se hamesha sharāb piine de

phir aisā vaqt kahāñ ham kahāñ sharāb kahāñ
tilism-e-dahr hai naqsh-e-bar-āb piine de

na chheḌ zāhid-e-nādāñ sharāb piine de
sharāb piine de ḳhāna-ḳharāb piine de

sharāb-ḳhāne meñ ye shor kyuuñ machāyā hai
ḳhamosh 'aḳhtar'-e-ḳhāna-ḳharāb piine de

jo ruuh ho chukī ik baar dāġh-dār mirī
to aur hone de lekin sharāb piine de

mai pī jo chāhe ātish-e-dozaḳh se tū najāt
jaltā nahīñ vo uzv jo tar ho sharāb meñ