Tags-Sharab

us ne paḌhī namāz to maiñ ne sharāb pī
donoñ ko lutf ye hai barābar nasha huā

donoñ kā lā-shu.ūr hai itnā milā huā
us ne jo pī sharāb to mujh ko nasha huā

piyūñ na rashk se ḳhuuñ kyūñki dam-ba-dam apnā
ki saath ġhair ke vo aaj ham-sharāb huā

barafaroḳhta ruḳh hai us kā kis ḳhūbī se mastī meñ
pī ke sharāb shagufta huā hai us nau-gul pe bahār hai aaj

garche ahl-e-sharāb haiñ ham log
ye na samjho ḳharāb haiñ ham log

jab se muñh ko lag ga.ī 'aḳhtar' mohabbat kī sharāb
be-piye āThoñ pahar madhosh rahnā aa gayā

ham ko ek bahut hī baḌī sachchā.ī ko afsāna karnā hai
ḳhuub piyeñge sharāb-e-vahm aur ḳhuub ḳhayāl-e-ḳhām kareñge

tirī mast aañkh ne ai sanam mujhe kyā nazar se pilā diyā
ki sharāb-ḳhāne ujaḌ ga.e jo nasha chaḌhā thā utar gayā

ġham-e-mohabbat ke ba.ad aatī hai sarhad-e-iltifāt-e-jānāñ
sharāb kī talḳhiyāñ sahoge to lazzat-e-be-ḳhudī milegī

bhare hue sāġhar o subū meñ sharāb bhar pā.egā na saaqī
to phir ġharīqān-e-aish-o-ishrat ko ḳhaak āsūdgī milegī

us ke piyāle meñ zahr hai ki sharāb
kaise ma.alūm ho baġhair piye

ye kā.enāt aur itnī sharāb-ālūda
kisī ne apnā ḳhumār-e-nazar bikherā thā

tire ḳhayāl kī mai dil meñ yuuñ utārī hai
kabhī sharāb se ḳhālī mirā subū na rahe

jab bhī baḌhī hai tishnagī mulk-o-avām kī
chhalkī hai qasr-e-shāh meñ thoḌī sharāb aur

mujh ko sunā.e jaate haiñ afsāne ḳhuld ke
Duubā huā huuñ mastī-e-sher-o-sharāb meñ

jo nuur dekhtā huuñ maiñ jām-e-sharāb meñ
vo āftāb meñ hai na vo māhtāb meñ

mastī ba-zauq-e-ġhaflat-e-sāqī halāk hai
mauj-e-sharāb yak-mizha-e-ḳhvāb-nāk hai

janāb-e-shaiḳh kī ye vo ruḳhī ma.āz-allāh
huī hai shab to chale haiñ sharāb-ḳhāne ko

terā firāq jān-e-jāñ aish thā kyā mire liye
ya.anī tire firāq meñ ḳhuub sharāb pī ga.ī

sharāb-ḳhāna hai bazm-e-hastī
har ek hai mahv-e-aish-o-mastī