Tags-Sharab

ġhusl-e-tauba ke liye bhī nahīñ miltī hai sharāb
ab hameñ pyaas lagī hai to koī jaam nahīñ

tū sharāb de ki na de magar mire dil ko toḌ na sāqiyā
ki ġharīb bāda-parast kā yahī shīsha hai yahī jaam hai

bārish hī ko ulaT ke banā do na tum sharāb
tum ko zarā mazāq-e-adab-parvarī nahīñ

kabhī ashk ban ke Dhalak ga.ī kabhī rashk ban ke jhalak ga.ī
vo sharāb jām-e-hayāt se jo shabāb ban ke chhalak ga.ī

burā hī kyā hai baratnā purānī rasmoñ kā
kabhī sharāb kā piinā bhī kyā halāl na thā

alāva iid ke miltī hai aur din bhī sharāb
gadā-e-kūcha-e-mai-ḳhāna nā-murād nahīñ

abr hai abr hai sharāb sharāb
sāqiyā sāqiyā shitāb shitāb

kūcha-e-husn chhuTā to hue rusvā-e-sharāb
apnī qismat meñ jo likkhī thī vo ḳhvārī na ga.ī

shīsha kahīñ se laao sharāb-e-farañg kā
baaqī jo thī hikāyat-e-dildār kuchh kaho

chal 'bashar' ḳhuuñ kā ghūñT hī pī le
paas meñ ab sharāb bhī na rahī

vo ḳhaas lamha jise umr-e-jāvedāñ kahiye
vo ban ke vasl kā jām-e-sharāb utrā thā

hujūm tishna-labāñ kī nigāh se ojhal
chhalak rahe haiñ sharāb-e-havas ke paimāne

āb-e-ravāñ o sabza o rū-e-nigār hai
saaqī shitāb aise meñ le kar sharāb aa

hai shakl terī gulāb jaisī
nazar hai terī sharāb jaisī

ye merī pyaas ke sāġhar tere laboñ kī sharāb
ravāj-o-rasm-e-mohabbat kā mojaza hogā

rind-e-sharāb-e-ḳhār rahā maiñ tamām-umr
añgūr kā nasīb mujhe āb-o-dāna thā

gandum jo ḳhuld meñ to yahāñ thī sharāb-e-nāb
ik maiñ thā do jagah pe mirā āb-o-dāna thā

sharāb-e-asr-e-nau meñ be-ḳhudī hai nai ḳhudī saaqī
jo tū ne aaj se pahle pilā.ī thī vahī mai lā

na sunoge 'soz' kī guftugū jo phiroge DhūñDne kū-ba-kū
ye nasha hai us ke bayān meñ ki nahīñ nasha hai sharāb meñ

pūchhte jaate haiñ ye ham sab se
majlis-e-vāz meñ sharāb bhī hai