Tags-Sharab

hosh naqs-e-ḳhudī hai ai 'ehsān'
lā uThā shīsha-e-sharāb uThā

shāhid-e-mai kī ḳhalvatoñ meñ pahuñch
parda-e-nashsha-e-sharāb uThā

aap ke paas mai ke pyāle haiñ
ham piyeñge sharāb āñkhoñ se

sharāb o sāqī-e-mah-rū jo saath hoñ 'bedār'
to ḳhush-numā hai shab-e-māhtāb meñ dariyā

maanā ki sharāb chhoḌī 'kaifī'
aisā to kaho na mai-kashī ko

nashe ke liye ik nayā shīsha ho
aur us meñ sharāb-e-kuhan chāhiye

asar sharāb kā ahd-e-vafā-e-yār meñ hai
qadam qadam pe jo laġhzish sī e'tibār meñ hai

yārab sarāb-e-ahal-e-havas se najāt de
mujh ko sharāb de unheñ āb-e-hayāt de

tumhārī aañkh meñ kaifiyyat-e-ḳhumār to hai
sharāb kā na sahī niiñd kā asar hī sahī

aaj bhī zindagī mirī ġharq-e-sharāb-e-tund-o-tez
aaj bhī haath meñ mire jām-e-sharāb-e-arġhavāñ

ḳhālī sahī balā se tasallī to dil ko ho
rahne do sāmne mire sāġhar sharāb kā

rah-e-talab kī lazzateñ haiñ aur himmat āfrīñ
ye talḳhiyāñ haiñ talḳhiyāñ sharāb-e-ḳhush-gavār kī

tasvīr ke do ruḳh haiñ jaañ aur ġham-e-jānāñ
ik naqsh chhupānā hai ik naqsh dikhānā hai

hamārī kashtī-e-tauba kā ye huā anjām
bahār aate hī ġharq-e-sharāb ho ke rahī

adā adā tirī mauj-e-sharāb ho ke rahī
nigāh-e-mast se duniyā ḳharāb ho ke rahī

'jalīl' fasl-e-bahārī kī dekhiye tāsīr
girī jo buuñd ghaTā se sharāb ho ke rahī

judā ho jab yaar apnā saaqī kahāñ kī sohbat sharāb kaisī
pilā.eñ gar ḳhizr āb-e-haivāñ ham us ko samjheñ yahī ki sam hai

mujh ko to sharāb se mastī hai aur
tan qaid ke chhūTne se hastī hai aur

majlis meñ raat girya-e-mastāñ thā tujh baġhair
sāġhar bharā sharāb kā chashm-e-pur-āb thā

tamām-umr ham apnī anā meñ mast rahe
vo nashsha sab se alag thā jo is sharāb meñ thā