Tags-Sharab

nazar-e-taġhāful-e-yār kā gila kis zabāñ siiñ bayāñ karūñ
ki sharāb-e-sad-qadah aarzū ḳhum-e-dil meñ thī so bharī rahī

aap nāhaq ḳhudā se Darte haiñ
shaiḳh sāhab sharāb ho jaa.e

pūchho ho mujh se tum ki piyegā bhī tū sharāb
aisā kahāñ kā shaiḳh huuñ yā pārsā huuñ maiñ

aaj kī raat bhī kartā hai koī kufr kī baat
chāñd ke phuul meñ shabnam kī sharāb aa.ī hai

ek din ai 'adam' na pī to kyā
roz shaġhl-e-sharāb karte ho

jām-e-sharāb ab to mire sāmne na rakh
āñkhoñ meñ nuur haath meñ jumbish kahāñ hai ab

piyūñgā aaj saaqī ser ho kar
mayassar phir sharāb aa.e na aa.e

vo sarḳhushī de ki zindagī ko shabāb se bahara-yāb kar de
mire ḳhayāloñ meñ rañg bhar de mire lahū ko sharāb kar de

sharāb-e-ishq faqat ik zarā sī chakkhī thī
baḌā surūr ghuTā muddatoñ ḳhumār rahā

pī kar sharāb gum maiñ rahūñ apne hosh meñ
ai zindagī ye terā taqāzā bhī ḳhuub hai

tū hai ġharq dahr meñ sar talak hai yahīñ ke suud kī fikr bas
tirā zohd kaisā ajiib hai ki faqat sharāb se aar hai

dil-nashīñ haiñ basant meñ 'kaifī'
ye sharāb-o-ḳhumār kī bāteñ

sharāb-e-ishq har millat meñ har maz.hab meñ jaa.ez hai
ye kyā aafat hai ai vaa.iz ravā ko nāravā karnā

dekhte hī kho gayā use
is qadar sharāb ho ga.ī

garche ahl-e-sharāb haiñ ham log
ye na samjho ḳharāb haiñ ham log

subū meñ aks-e-ruḳh-e-māhtāb dekhte haiñ
sharāb piite nahīñ ham sharāb dekhte haiñ

bhalā 'imām' tahajjud guzār kyā jāneñ
ki raat kitnī hasīñ hai sharāb-ḳhāne kī

haram ke paas pahuñchte hī thak ke baiTh ga.e
vagarna raah to lī thī sharāb-ḳhāne kī

saaqī se kah do sabza-e-tar meñ bahā sharāb
Tāñke kadū kī bel qabā-e-nabāt meñ

mastī meñ un ko lag ga.ī lau aur ġhair kī
denī shab-e-visāl na thī is qadar sharāb