Tags-Sharab

maiñ thā kisī kī yaad thī jām-e-sharāb thā
ye vo nashist thī jo sahar tak jamī rahī

jināñ meñ pahle-pahal piyegā to laḌkhaḌātā phiregā zāhid
surūr-e-kausar kī hai agar dhan jahāñ meñ pī le sharāb pahle

bajā ki hai pās-e-hashr ham ko kareñge pās-e-shabāb pahle
hisāb hotā rahegā yārab hameñ mañgā de sharāb pahle

āñkheñ batā rahī haiñ ki jaage ho raat ko
in sāġharoñ meñ bū-e-sharāb-e-visāl hai

pilā de muft mujhe ai saḳhī ke laal sharāb
ġharīb-e-riñd huuñ merī girah meñ daam nahīñ

sharāb-ḳhāna-e-duniyā meñ ai balā-nosho
kisī ko sāġhar-e-mai kī tarah qayām nahīñ

kitne sharāb pī kar ho mast chhak rahe haiñ
mai kī gulābī aage pyāle chhalak rahe haiñ

kaisī sharāb huuñ ki hai tishna mire hī lab
apne liye maiñ durd-e-tah-e-jām kab huā

saaqī sharāb lā ki tabī.at udaas hai
mutrib rubāb uThā ki tabī.at udaas hai

haa.e vo chashm-e-nargis-e-jām-e-sharāb-e-ātishīñ
gardish-e-chashm-e-yār ne luuT liyā luTā diyā

vo but-kada thā jahāñ sar jhuke charāġh jale
ye mai-kada hai yahāñ ḳham uThe sharāb chale

kabhī mai se muñh ko na moḌiye havas-e-sharāb na chhoḌiye
sar-e-mohtasib hai na toḌiye jo kamāl-e-ġhaiz par aa.iye

dete haiñ mere jaam meñ dekheñ sharāb kab
aatā hai māhtāb ke ghar āftāb kab

ham ko piine se ġharaz kyā ye sharāb-e-zāhirī
in kī nazreñ jab uThīñ mujh ko ḳhumār aa hī gayā

mahrūm rah na jaa.e koī tishna-kām 'rāz'
arzāñ sharāb-e-rāz kiye jā rahā huuñ maiñ

kahāñ ham aur kahāñ ab sharāb-ḳhāna-e-ishq
na vo dimāġh na vo dil na vo zamāna-e-ishq

ga.ī dimāġh meñ jis ke kiyā asiir use
ajab kamand hai bū-e-sharāb-ḳhāna-e-ishq

mashrab meñ to durust ḳharābātiyoñ ke hai
maz.hab meñ zāhidoñ ke nahīñ gar ravā sharāb

tirī ma.arifat kī sharāb meñ vo surūr-o-kaif-e-davām hai
mai-e-talḳh meñ bhalā kyā maza mai-e-talḳh piinā harām hai

vo zakāt-e-daulat-e-sabr bhī mire chand ashkoñ ke naam se
vo nazar-guzar kī sharāb thī jo chhalak ga.ī mire jaam se