Tags-Sharab

piite haiñ jo sharāb masjid meñ
aise logoñ ko pārsā kahiye

sharāb kā shaġhl ho rahā hai baġhal meñ paatā huuñ maiñ kisī ko
maiñ jāgtā huuñ ki so rahā huuñ ḳhayāl meñ huuñ ki ḳhvāb meñ huuñ

namāz kaisī kahāñ kā roza abhī maiñ shaġhl-e-sharāb meñ huuñ
ḳhudā kī yaad aa.e kis tarah se butoñ ke qahr-o-itāb meñ huuñ

amrit sharāb zahr ajī kuchh to Dāliye
aa.e haiñ le ke duur se ḳhālī gilass ham

afsos sharāb pī rahā huuñ tanhā
ġhalatāñ-ba-subū tamām ḳhūn-e-fan-hā

taskīn-e-ḳhulq-e-sāqī ko piitā huuñ maiñ sharāb
merī nazar meñ saaqī hai paimāna to nahīñ

nafas na anjuman-e-ārzū se bāhar khīñch
agar sharāb nahīñ intizār-e-sāġhar khīñch

ḳhud-shanāsī kī sharāb-e-ātishīñ bhar kar 'nushūr'
kāsa-e-muflis ko jām-e-jam banā saktā huuñ maiñ

is chashm-e-nīm-vā kī hai mastī sharāb meñ
sāġhar meñ saare rañg usī kī hayā ke haiñ

saaqī jo dil se chāhe to aa.e vo zamāna
har shaḳhs ho sharābī har ghar sharāb-ḳhāna

sharāb-e-ātishīñ vo hai ki do ik ghūñT piite hī
jo saaqī ho to aatā hai nazar paimāna mastī meñ

jab bhī barsī azaab kī bārish
raas aa.ī sharāb kī bārish

kahāñ chashma-e-ḳhizr kaise ḳhizar
ḳhizar hai mirī zindagānī sharāb

vo sho.ala hai saaqī ki rañjak kī tarah
uḌā detī hai nā-tavānī sharāb

hue mast dekhā jo phūloñ kā rañg
piyāloñ meñ thī arġhavānī sharāb

pilā sāqiyā arġhavānī sharāb
ki piirī meñ de naujavānī sharāb

rahe taaq par pārsā.ī 'amīr'
pilā.e jo vo yār-e-jānī sharāb

mire chehra-e-zard ke aks se
huī sāqiyā za.afrānī sharāb

ajab sāqiyā gandumī rañg hai
ki partav se bantī hai dhānī sharāb

kahāñ aql-e-barnā kahāñ aql-e-pīr
na.e se hai behtar purānī sharāb