Tags-Sher

vahīñ se sher meñ barjastagī nahīñ rahtī
jahāñ se haal chhupāne kī baat kartā huuñ

sher 'munīr' likhūñ maiñ uTh kar sehn-e-sahar ke rañgoñ meñ
yā phir kaam ye nazm-e-jahāñ kā shaam Dhale ke ba.ad karūñ

ġhazal kā sher to hotā hai bas kisī ke liye
magar sitam hai ki sab ko sunānā paḌtā hai

saare shā.er sher kahāñ kah paate haiñ
aksar to lafzoñ kā kartab hotā he

ḳhvāb jab jab hue zaḳhmī to hue sher na.e
varna ye mo.ajaze har roz kahāñ hote haiñ

kāmilān-e-suḳhan ko paḌh paḌh kar
sher-goī meñ kuchh to naam kiyā

kaifiyat-e-tazād agar ho na bayān-e-sher meñ
'nātiq' isī pe ro.e kyuuñ chañg-navāz gaa.e kyuuñ

dushman-e-jāñ bhī tirī baat ke qātil haiñ 'jamīl'
tere har sher meñ aḳhlāq hai sachchā.ī hai

sharāb o sher ke dariyā meñ Duub kar 'sāġhar'
surūr-o-kaif ke dhāroñ se khel saktā huuñ

koī ye kah rahā thā kal 'mubashshir' sher kahtā hai
sune us ke bhī kuchh ash.ār lekin dil nahīñ lagtā

aksar mujh se mahīnoñ 'kāshif' koī sher nahīñ ho paatā
taaza zaḳhm magar lagte hī tāza-kārī ho jaatī hai

kyā batā.ūñ maiñ rah-e-sher-o-suḳhan meñ ai 'atīb'
naqsh chhoḌe haiñ mirī fikr-e-rasā ne kitne

aalī sher ho yā afsāna yā chāhat kā taanā baanā
lutf adhūrā rah jaatā hai puurī baat batā dene se

be-barg-o-navā kī sher ḳhvānī ma.alūm
be-dāna-o-dām nukta-dānī ma.alūm

do bol dil ke haiñ jo har ik dil ko chhū sakeñ
ai 'ashk' varna sher haiñ kyā shā.irī hai kyā

zabāñ ko zā.iqa-e-sher-e-tar nahīñ miltā
baḌhā hai zor zabāñ meñ asar nahīñ miltā

kul ġhazal ek qāfiya ai 'shād'
sher ma.ayūb haiñ ye jitne haiñ

sunā hai tujh ko bhī hai sher-o-shā.erī se shaġhaf
tū mere sher ko phir 'shāhid' misāl meñ rakh

maiñ ḳhvāb dekhtā huuñ aur sher kahtā huuñ
hunar-varoñ ne ise bhī hunar hī jaanā hai

sachche sher kā khaliyān aur bhartā jaatā hai
dard kī zamīnoñ meñ ġham kī fasl bone se