Tags-Sher

kuchh sher shāyad us ko pasand aa ga.e 'kamāl'
hoñToñ ke kuchh nishāñ haiñ tumhārī kitāb meñ

sāz-e-hastī pe agar gaao to kuchh baat bane
sher ban jaa.eñ jo ye ghaav to kuchh baat bane

zamīn achchhī lagī sher kahne kī ḳhātir
so maiñ radīf ye laayā munāfiqat kyā hai

vahī rah jaate haiñ zabānoñ par
sher jo intiḳhāb hote haiñ

maiñ ġhazal kā asiir huuñ 'ejāz'
sher paḌhtā huuñ maiñ tarannum se

ki jis se sher meñ ma.anī kā iltavā hī na ho
suḳhan ke baab meñ vo tajraba qubūl nahīñ

terī hī guftugū se kiyā paidā ik ḳhayāl
phir sher kahne lag gayā lahja nayā huā

kuchh aur vasīla mire iz.hār ko kam thā
sau maiñ ne mirī jaan sadā sher-garī kī

ham ne sab sher meñ sañvāre the
ham se jitne suḳhan tumhāre the

kahte haiñ 'aḳhtar' vo sun kar mere sher
is tarah ham ko na rusvā kījiye

sher mere bhī haiñ pur-dard va-lekin 'hasrat'
'mīr' kā sheva-e-guftār kahāñ se lā.ūñ

sher kahne meñ mujhe 'ājiz' maza aane lagā
us ne jab be-sāḳhta mujh ko suḳhan-var kah diyā

kabhī vo sher kahā kartā thā hamāre liye
ham us ke sher usī ko sunānā chāhte haiñ

ham se to ik sher sun kar falsafī chup ho gayā
lekin us ne be-zabāñ naqqād ko chāTā bahut

dūsrī bātoñ meñ ham ko ho gayā ghāTā bahut
varna fikr-e-sher ko do vaqt kā aaTā bahut

ai mire sho.ala-e-dil sho.ala-e-sher-o-dānish
raat āḳhir hai use jashn-e-sharar-bārī de

sher ke ruup meñ dete rahnā
'ehtirām' apnī ḳhabar aage bhī

daftar se uThe kaife meñ ga.e kuchh sher kahe kuchh coffē pī
pūchho jo ma.āsh kā 'inshā'-jī yuuñ apnā guzārā hotā hai

'zaidī' ne taaza sher sunā.e ba-rañg-e-ḳhās
ham bhī ḳhudā-e-shoḳhī-e-afkār ho ga.e

tū agar ḳhush hai to jā qāfiya-paimā.ī kar
sher ko ruuh kī laḌiyoñ meñ pirone de mujhe