Tags-Sher

munhadim hotā huuñ har aan pas-e-harf-e-kuhan
tab kahīñ sher kī ta.abīr na.ī hotī hai

lafz kī hurmat muqaddam hai dil-o-jāñ se mujhe
sach ta.āruf hai mire har sher har tahrīr kā

har bahr har zamīn meñ kahtā huuñ ḳhuub sher
kab ye kamāl ab kisī ahl-e-hunar meñ hai

kyā sher mazedār 'munīr' aaj paḌhe haiñ
har baat meñ e.ajāz hai kyā baat tumhārī

'shā.ir' ye zamīñ hazrat-e-ġhālib kī zamīñ hai
har sher talab kartā hai ḳhūn-e-rag-e-jāñ aur

na likkhā sher koī aur samajh baiThe haiñ nādāñ
adab meñ harba-e-tash.hīr rahne ke liye hai

'mus.hafī' thā zi-bas-ki āshiq-e-sher
marte marte rahī kitāb meñ jaan

dard-e-judā.ī meñ likkhe haiñ sher tumhāre naam bahut
tum mere ghar meñ rahtīñ to kyā aisā hotā jānam

hañsī hañsī meñ har ik ġham chhupāne aate haiñ
hasīn sher hameñ bhī sunāne aate haiñ

'mīr' ke sher kā ahvāl kahūñ kyā 'ġhālib'
jis kā dīvān kam-az-gulshan-e-kashmīr nahīñ

be-charāgī se terī mire shahr-e-dil
vādī-e-sher meñ kuchh ujālā sā thā

likhūñ kaise ki saare sher tum par
bahut nāyāb likhnā chāhtā huuñ

muntaḳhab kar ke varaq dil pe likhe haiñ ahbāb
garche zāhir meñ mire sher kī shohrat niiñ hai

jis ne yaaro mujh se da.avā sher ke fan kā kiyā
maiñ ne le kar us ke kāġhaz aur qalam aage dharā

dekhā nigāh-e-ġhaur se ham ne jo ai 'nasīm'
har sher is ġhazal kā tirī intiḳhāb hai

hamāre sher haiñ ab sirf dil-lagī ke 'asad'
khulā ki fā.eda arz-e-hunar meñ ḳhaak nahīñ

girā na aañkh se aañsū fareb-e-qismat par
sukūn jis se ho vo iztirāb paidā kar

kahtā hai dil kī baat magar apne sher meñ
qismat kā maarā 'āsī'-e-gumnām jo bhī ho

yahī sher haiñ mirī saltanat isī fan meñ hai mujhe āfiyat
mire kāsa-e-shab-o-roz meñ tire kaam kī koī shai nahīñ

jitnī āñkheñ haiñ vo hairān huī jaatī haiñ
aur mire sher sunātā huā jaatā huā tū