Tags-Sher

sher kahnā nahīñ hai sahal 'farāz'
ye vadī.at hai qudratī mujh meñ

sher merā thā daad us ko milī
shaḳhsiyat kī kamī jo thī mujh meñ

ham raftagāñ se haT ke bhī dekheñ to sher meñ
mauzūa kam hī bachte haiñ nauha nikāl ke

ishq kā zikr sher meñ kyuuñ hai
ye to 'ālī' ġham-e-darūñ na huā

sher kiye mauzūñ to aise jin se ḳhush haiñ sāhib-e-dil
roveñ kuḌheñ jo yaad kareñ ab aisā tum kuchh 'mīr' karo

kāġhaz ko sab sauñp diyā ye Thiik nahīñ
sher kabhī ḳhud par bhī taarī kiyā karo

'dāġh' ke sher javānī meñ bhale lagte haiñ
'mīr' kī koī ġhazal gaao ki kuchh chain paḌe

kyuuñ na vaahī ho sher 'qā.em' kā
hai divāne kī āḳhirash tasnīf

ye naġhma sā ye 'khullar' sher terā
ibādat thā adā hone se pahle

ai 'jahāñdār' mashq-e-sher meñ ab
tū ne paayā kamāl kuchh kā kuchh

us ke dam se kahe sher maiñ ne 'hilāl'
phuul is dhuup meñ jo khilā rah gayā

tab-e-ālī se agar auj-e-bayāñ paidā karūñ
maiñ zamīn-e-sher meñ bhī āsmāñ paidā karūñ

vo ek laḌkī samajhte the nā-samajh jis ko
hamāre sher pe vo kar ke vaah vaah ga.ī

sher-goī nahīñ sīkhī hai 'jamīla' maiñ ne
merī fitrat ne kiyā sāhab-e-dīvāñ mujh ko

ġhazal ke sher jo rusvā-e-intiḳhāb hue
bharam nazar kā pas-e-intiḳhāb TuuT gayā

phir har ik sher meñ kuchh dard kā paatā huuñ asar
phir kahīñ hazrat-e-'beḳhud' kī tabī.at aa.ī

ek misra ki koī sher atā kar ke mujhe
apne chakkar meñ ka.ī roz ghumātī hai ġhazal

sher kahne kā salīqa bhī sikhā do mujh ko
aaj ye kaam bhī kar jaao ġhazal hone tak

tum agar chāho to har sher shagufta ho jaa.e
bas mire dil meñ utar jaao ġhazal hone tak

kuchh sher shāyad us ko pasand aa ga.e 'kamāl'
hoñToñ ke kuchh nishāñ haiñ tumhārī kitāb meñ