Tags-Sher

sher kahnā to ḳhair mushkil hai
sher paḌhnā hī siikh jaao miyāñ

sher sunā koī aisā jis se lage badan meñ aag
niiñd uḌ jaa.e jis se aisī koī kahānī de

mere saath sū-e-junūn chal mire zaḳhm khā mirā raqs kar
mere sher paḌh ke milegā kyā patā paḌh ke ghar koī pā sakā?

ham ne kab sher kahe ham se kahāñ sher hue
marsiya ek faqat apnī sadī kā likhkhā

'jālib' mere sher samajh meñ aa jaate haiñ
isī liye kam-rutba shā.er kahlātā huuñ

kisī kā ḳhūb-sūrat sher sun kar
tirā lutf-e-suḳhan yaad aa gayā hai

vo shaḳhs jis ke liye sher kah rahā huuñ 'nasīr'
ġhazal sunā.e hue us ko ik zamāna huā

ḳhudā-e-arsh-e-suḳhan se huuñ faizyāb 'kalīm'
ki tūr-e-sher se laayā huuñ maiñ kitāb bhī saath

maiñ ab bhī paḌhtā huuñ taz.īn-e-sher-o-fan ke liye
tamām raat tirī ḳhush-nisāb āñkhoñ ko

sher achchhe hoñ to be-gā.e bhī mil jaatī hai daad
tū ḳhudārā lahn ke hāthoñ meñ mat kashkol de

shā.ir-e-rañgīñ fasāna ho gayā
sher bulbul kā tarāna ho gayā

be-sūd har ik qaul har ik sher hai 'rāġhib'
gar us ke muāfiq tirā kirdār nahīñ to

kuchh kitābeñ aur qalam kāġhaz ke kuchh purzoñ pe sher
mere ghar meñ hai yahī bas qīmtī asbāb sā

terā har sher hai 'bebāk' amal kī dāvat
yā koī mūsī-e-imrāñ kā asā hotā hai

hamārā sher bhī lauh-e-tilism hai shāyad
har ek ruḳh se hameñ be-naqāb kartā hai

un logoñ se pūchhe koī sher kā rutba aur shu.ūr
jin logoñ ne ġhazal ko apnā ḳhuun pilāyā hotā hai

ālamī sher-o-adab meñ huī urdu bhī sharīk
aap ne zor-e-kalām apnā dikhāyā kyā kyā

sher kahte ho to ye baat bhī nazroñ meñ rahe
shā.irī sharh-e-tabī.at ke sivā kuchh bhī nahīñ

sher kyā hai aah hai yā vaah hai
jis se har dil kī ubhar aatī hai choT

ḳhayāl-e-zehn-shikan se zabān bhar aa jaa.e
ye ho to haath mire koī sher-e-tar aa jaa.e