Tags-Sher

ma.āshre meñ jo mash.hūr ho gayā 'irfāñ'
vo ek sher tirī shā.irī kā hāsil hai

parinde bolne lagte haiñ mujh meñ raat ga.e
to shāḳh-e-sher pe maiñ bhī chahakne lagtā huuñ

vo mire sher hī to haiñ 'sho.ala'
jin ko qand-o-nabāt kahte haiñ

raat bhar maiñ ne sañvārī zulf-e-lailā-e-ġhazal
sher kī aamad thī 'hāshim' yā koī sailāb thā

ye sher-goī hai 'aḳhlāq' koī khel nahīñ
kare vo mashq jo chhalnī meñ aab le aa.e

mahfil par jab niiñd sī chhā.ī sab ke sab ḳhāmosh hue
ham ne tab kuchh sher sunāyā logoñ ko bedār kiyā

kyā kaheñ kaifiyyat-e-'tanvīr' ham
sher kahtā hai na jaane kis liye

na kisī ne qadr kī 'jur.at' ab kahe sher garche ajab ajab
jo na hoñge ham to kaheñge sab ki baḌā ye ahl-e-kamāl thā

sabaq ko dekhtā huuñ raat bhar aur phir ulajhtā huuñ
mutavval muḳhtasar vo sharh-e-sher-e-zulf-e-pechāñ hai

sher kyā ġhazal kaisī ai 'hasan' ye fan hai jis ko kuchh hī samjheñge
DhūñDh paao to DhūñDho in chhupe ishāroñ meñ apnī dāstāñ logo

sher kā ruup badal kar 'bāqī'
dil ke kuchh zaḳhm zabāñ par aa.e

sher kahtā nahīñ agar maiñ bhī
ḳhirqa pahne qalandarī kartā

chaman-e-sher meñ huuñ ik shajar-e-zinda magar
abhī 'mullā' mirī Daalī ye samar lagtā hai

na bāñdho sher meñ duzd-e-hinā kā ai 'qalaq' mazmūñ
kahegā yaar shoḳhī se ye hai mazmūn chorī kā

khilte haiñ gul-e-sher har ik roz mah-o-sāl
'aḳhtar' mire gulzār pe aafat nahīñ aatī

lā-makāñ sher kī bandish meñ simaTnā pal bhar
āsmāñ ā.īna-e-āb-e-ravāñ meñ aanā

sher to mujh se terī āñkheñ kahlā letī haiñ
chup rahtā huuñ maiñ jab tak tahrīk nahīñ hotī

fan itnā kam kyā hai ki in rozoñ 'mus.hafī'
dil meñ ik uns rakhte haiñ sher-e-arab se ham

ash.ār mire yuuñ to zamāne ke liye haiñ
kuchh sher faqat un ko sunāne ke liye haiñ

ye sher haiñ hameñ ḳhairāt meñ nahīñ milte
kabhī dhueñ se kabhī jaam se nikālte haiñ