Tags-Sher

maiñ ne apne parda-e-sher meñ tujhe is hunar se chhupā liyā
ki ġhazal kahī to har ik ġhazal tirī ḳhushbuoñ se bharī rahī

yuuñ bhī huā ik arse tak ik sher na mujh se tamām huā
aur kabhī ik raat meñ ik dīvān mujhe ilhām huā

un ko bhī mujhe sher sunāne kā huā hukm
kuchh sher se jin ko koī nisbat bhī nahīñ hai

sher meñ saath ravānī ke ma.ānī bhī to bhar
ai 'sadā' qaid tū kuuze meñ samundar kar de

itnā maiñ sher-fahm nahīñ huuñ magar yahāñ
chhapte haiñ intiḳhāb mire dekhne ke ba.ad

abhī ik sher kahnā rah gayā hai
abhī niklā nahīñ kāñTā hamārā

kaise kaise na mab.hūt-kun sher nāzil hue qalb par
terī haibat ke shāyān-e-shāñ ek misra bhī utrā nahīñ

kaun lafzoñ ko detā hai ma.anī na.e
aur mire sher ko pech-o-ḳham bhī nayā

kamāl-e-husn kā jab bhī ḳhayāl aayā hai
misāl-e-sher tirā naam dil pe utrā hai

ye sher mere use sunā do
pūchhe jo koī 'jigar' maiñ kyā huuñ

rañgīn tire zikr se ham sher o suḳhan ko
ai jān-e-suḳhan markaz-e-fan karte raheñge

Diary meñ saare achchhe sher chun kar likh liye
ek laḌkī ne mirā dīvān ḳhālī kar diyā

kahe sau sher tum ne sust to hāsil 'hafīz' is kā
ġhazal ho chust chhoTī sī to baitoñ kī kamī achchhī

ye kār-e-sher bhī ik kār-e-ḳhair jaisā hai
ke taaq taaq jalo lau baḌhā ke so jaao

ik ashk bahā hogā
ik sher huā hogā

jahāñ kuchh dard kā mazkūr hogā
hamārā sher bhī mash.hūr hogā

aalī nazar ke sher pe tīkhe mubāhise
be-nūr ālimoñ kā maraz lā-ilāj hai

merā zauq-e-sher hai mamnūn-e-iḳhlās-e-nazar
koī fan-pāra mirā me.aar se girtā nahīñ

'nushūr' āḳhir kahāñ tak fikr-e-duniyā dil dukhā.egī
ġham-e-hastī ko zauq-e-sher kartā jā rahā huuñ maiñ

zabāñ atā kare sher un kī be-zabānī ko
jo apne karb kā iz.hār kar nahīñ sakte