Tags-Sher

mire safar meñ koī ajnabī sā rahtā hai
muhīt sher ke jab imtihāñ meñ tairtā huuñ

diary roz bulātī hai mujhe likhne ko
ek muddat se koī sher nahīñ likkhā hai

maiñ samajh jaatā huuñ is meñ koī kamzorī hai
mere jis sher pe miltī hai bahut daad mujhe

'faiz'-sāhib sher kyuuñ kahte nahīñ
'faiz'-sāhib sher kahnā chāhiye

usī ko ek ġhanīmat qarār dūñgā 'zafar'
jo ek sher bhī tūmār se nikal aayā

ai 'zakī' mujh ko mil ga.ī me.arāj
mere sher intiḳhāb hone lage

ḳhudā bachā.e tasavvuf-gazīda logoñ se
koī jo sher bhalā sun liyā to haal aayā

ham sher-e-namak-rez sunāte sar-e-mahfil
jo zaḳhm fasurda thā tar-o-tāza bhī hotā

na jaane sher meñ kis dard kā havāla thā
ki jo bhī lafz thā vo dil dukhāne vaalā thā

surḳh lafz haiñ mere maiñ bhī sher kahtā huuñ aur jab sunātā huuñ
koī bol uThtā hai sher sher meñ tere ek ġham-gusārī hai

thoḌī rusvā.ī tumhārī bhī to hogī yaaro
chhap ga.e sher hamāre jo risāloñ meñ kabhī

ġhazal meñ khīñch ke rakh dī hai apnī jaañ irfān
har ek sher meñ dil kā lahū bahā gayā huuñ

apne lahje kī hifāzat kījiye
sher ho jaate haiñ nā-mālūm bhī

giit rasīle bol sajīle kahāñ sunoge ab tum
ab to kahtā hai 'irfān' bhī sher rulāne vaale

nahīñ sunñā kisī ne sher koī
yahāñ par jī-huzūrī chal rahī hai

umr bhar sher kahe ham ne pa tū ne ai ishq
na to huznī hī kiyā aur na aahī ham ko

sunā hai us ko bhī hai sher o shā.irī se shaġhaf
so ham bhī mojaze apne hunar ke dekhte haiñ

ġhazal meñ sher bahut narm ho ga.e 'aḳhtar'
ye kis zabān meñ kahte ho bad-maza na karo

jahāñ koshish zarā kī naqd-e-mazmūn us se haath aayā
zamīn-e-sher meñ bhī dafn kyā koī ḳhazāna hai

ye ġham jo us ne diyā hai hunar se mere 'shakīl'
mizāj-e-sher meñ Dhal jaa.e to ġhanīmat hai