Tags-Sher

jalāl ko bhī vaqt ne samo diyā hai sher meñ
ġhazal kā matmah-e-nazar jamāl hī nahīñ rahā

dukh meñ mahrūm aas thoḌī haiñ
mere sab sher yaas thoḌī haiñ

bhale zamāne the jab sher suhūlat se ho jaate the
na.e suḳhan ke naam pe 'az.har' 'mīr' kā charba hotā thā

zabān-e-sher pe mohar-e-sukūt hai ab tak
jalāl-e-saut-o-suḳhan rañg par nahīñ aayā

ye raġhbat hai use aġhyār se jab sher kahtā hai
to mazmūñ bhī ḳhayāl-e-yār meñ begāna aatā hai

kuchh dil-ḳharāsh sher kahe aur chal basā
haañ zindagī meñ itnī hī mohlat milī mujhe

purāne zāviye se sher kah ke
kahāñ tak 'haq' ġhazal-kārī karoge

maiñ saare kāġhazoñ pe ek misra likh ke rakkhūñgā
vo jab tak aa ke mere sher ko puurā nahīñ kartā

aadhī umr kaT ga.ī ḳhayāl-o-ḳhvāb meñ
sher sab kaheñge aur sunā kareñge ham

larzish-e-lab meñ sharāb-o-sher kā tūfān hai
jumbish-e-mizhgāñ meñ afsūn-e-ġhazal-ḳhvānī hai aaj

paikar-e-sher meñ Dhal jaa.e kisī kā chehra
mere iz.hār-e-mohabbat kā ye me.aar nahīñ

vo ek sher jo maiñ ne kahā nahīñ ab tak
vo ek raaz jise maiñ chhupā nahīñ saktā

saḳht pathrīlī zamīñ par bhī khilāte haiñ gulāb
sher ham kahte haiñ aur sab se sivā kahte haiñ

ek ik sher se Tapke haiñ lahū ke qatre
merī dushman ye tabī.at kabhī aisī to na thī

raaz na pūchho mustaqbil kā sher-o-suḳhan kī is mahfil kā
sāhab-e-fan zulmat meñ paḌe haiñ duur charāġh-e-fan jaltā hai

jā paḌe chup ho ke jab shahr-e-ḳhamoshāñ meñ 'nazīr'
ye ġhazal ye reḳhta ye sher-ḳhvānī phir kahāñ

tausīf koī kar sake kyā ai 'shah-e-ālam'
rutba hai tere sher kā guftār se aalī

vo sañglāḳh zamīnoñ meñ sher kahtā thā
ajiib shaḳhs thā khiltā gulāb jaisā thā

nikālā hai ye rañg 'hālī' ne 'sālik'
ki har sher dīvāñ huā chāhtā hai

anjuman meñ miyāñ-bashārat kī
ya.anī ik shaḳhs sher-ḳhvāñ bhī thā