Tags-Sher

koī aisā sher bhī de ḳhudā jo tirī atā ho tirī atā
kabhī jaisā maiñ ne kahā na ho kabhī jaisā maiñ ne sunā na ho

mā.il-e-sher-o-ġhazal phir hai tabī.at 'asġhar'
abhī kuchh aur muqaddar meñ hai rusvā honā

yā-rab atā ho zaḳhm koī sher-āfrīñ
ik umr ho ga.ī ki mirā dil nahīñ dukhā

ḳhushk āñkhoñ ko ravānī hī nahīñ mil paa.ī
yuuñ to ham ne bhī ka.ī sher kahe haiñ ab tak

kyā sher haiñ āb-dār 'mārūf'
goyā motī piro ga.e ham

sunā hai us ko bhī hai sher o shā.irī se shaġhaf
so ham bhī mo.ajize apne hunar ke dekhte haiñ

tere chehre kī tarah aur mire siine kī tarah
merā har sher damaktā hai nagīne kī tarah

'mus.hafī' kyā ḳhaak ham sher-o-suḳhan par jī lagā.eñ
shā.erī ye kuchh hai lekin qadr-dāñ koī nahīñ

ab is josh-e-ḳhud-āgāhī meñ aage kī kyā sochī hai
sher kahoge ishq karoge kyā kyā Dhoñg rachāoge

sher meñ phūTte haiñ apnī zabāñ ke chhāle
nutq rakhte haiñ magar sab se judā rakhte haiñ

mire sher mujh ko haiñ jaañ se aziiz
jise bhī sunānā adab se sunānā

vo jis ke sāmne khulte nahīñ haiñ lab mere
usī ko sher sunānā hai kyā kiyā jaa.e

taḳhlīq kise kahte haiñ hai azmat-e-fan kyā
āvāz-faroshoñ ke liye sher-o-suḳhan kyā

sher kī taḳhlīq 'kāvish' fel-e-jinsī to nahīñ
mānavī aulād par hī naaz karnā chāhiye

yuuñ to mushkil hai bahut dard batānā sab ko
so yahī soch ke ham sher sunā dete haiñ

ham bhī do ik sher le chalte haiñ tere chashm o lab se
phuul bhī ḳhushbū tujhī se maañg ke le jā rahe haiñ

maiñ tirī baat chamelī se karūñ
sher kah duuñ ki pahelī se karūñ

'dāġh' ḳhāmosh na lag jaa.e nazar
sher dīvān huā jaatā hai

unheñ maiñ sher kī sūrat kabhī ugal dūñgā
jo dil meñ dard ke tūfān bante jaate haiñ

tum sunāo nā koī sher 'ahmad'
aaj jī kartā hai sunūñ vahshat