Tags-Sher

rāh-e-talab meñ dām-o-diram chhoḌ jā.eñge
likh lo hamāre sher baḌe kaam ā.eñge

shā.irī ko mirā iz.hār samajhtā hai magar
parda-e-sher uThānā bhī nahīñ chāhtā hai

sher ke lab pe ḳhamoshī likkheñ
harf-e-nā-gufta ko lā-fānī kareñ

umr bhar sher kaheñ ḳhuuñ thūkeñ
muntaḳhab rāsta nuqsānī kareñ

sher hote nahīñ to 'alvī' ne
ḳhuun meñ uñgliyāñ Dubo lī haiñ

miTā de jo fazā kī tīrgī māhaul kī pastī
koī aisā bhī sher ai shā.irān-e-ḳhush-bayāñ likhiye

vo sher kaho miyāñ-'muzaffar'
ā.īna shash-jahāt hove

qad-e-mauzūñ ke ishq meñ 'goyā'
raat din shuġhl-e-sher-ḳhvānī hai

hai har ik sher yaar kī tasvīr
fikr apnī ḳhayāl-e-mānī hai

mire sher paḌh kar akele meñ aksar inheñ zer-e-lab gungunātī to hogī
mire naam phir kuchh vo likhne kī ḳhātir qalam be-irāda uThātī to hogī

aalī sher ho yā afsāna yā chāhat kā taanā baanā
lutf adhūrā rah jaatā hai puurī baat batā dene se

sher kaho to chup rahe kuchh na kaho to chauñk uThe
shahr meñ ek 'zubair' hai shā.ir-e-kam-dimāġh sā

un pe likkhe sher 'iqrā'
kuchh aur bhī achchhe hote haiñ

vo jo haiñ lazzat-e-tafhīm-e-suḳhan se vāqif
sher sunte haiñ vahī log mukarrar mujh se

baalā terā maqām duniyā-e-sher meñ
'urfī' bhī ek banda-e-halqa-e-ba-gosh hai

kitāboñ meñ mileñge sher mere
mirā ġham raunaq-e-safhāt hogā

'sāz' jab khulā ham par sher koī 'ġhālib' kā
ham ne goyā bātin kā ik surāġh sā paayā

dil-e-shab meñ sub.h kī dhaḌkaneñ abhī ibtidā-e-ġhazal meñ thiiñ
ki vo aa.e aur tamām sher mirī hī dhun meñ sunā ga.e

juḌā hai zaat se us kī har ek sher us kā
jo pattā shāḳh se toḌo lahū nikaltā hai

vo merā sher jab merī hī lai meñ gungunātī thī
manāzir jhūmte the bām-o-dar ko vajd aatā thā