Tags-Sher

sher dil meñ utar nahīñ paa.e
kyūñki dil kī zabāñ ke the hī nahīñ

tum ho shā.er mirī jaan jiite raho
sher kahte raho zahr piite raho

ab muzayyan hai talaffuz se avāmunnās ke
sher sarf-o-nahv ke chakkar se uktāyā huā

yahī charchā hai majlis meñ sajan kī har zabāñ upar
mirā qissa goyā mazmūñ huā hai sher-e-hālī kā

maiñ sher kahne se Dar rahī huuñ
ḳhayāl himmat bañdhā rahā hai

jab vaqt ne chhānī haiñ 'muzaffar' kī bayāzeñ
har sher meñ nudrat kā dafīna nikal aayā

sab kā dard sameT ke vo tāsīr hai mere lafzoñ meñ
jo bhī mere sher paḌegā vo merā ho jā.egā

tumhāre pyaar meñ ġhazleñ hazāroñ kah gayā varna
faqat ik sher kahne meñ mashaqqat kam nahīñ hotī

sab pe pābandī usūloñ kī 'siyā' lāzim hai
suḳhan-o-sher ko jāgīr nahīñ kar sakte

mā.il-e-sher-o-ġhazal phir hai tabī.at 'asġhar'
abhī kuchh aur muqaddar meñ hai rusvā honā

usī ke rañg kā pahnā agar libās to kyā
usī kī tarz meñ ab sher bhī sunā.ūñ use

TuuT ga.iiñ naġhmoñ kī tanābeñ sher ke ḳheme raakh hue
bazm-e-suḳhan meñ jab bhī 'salīm' is sho.ala-navā kī baat chalī

sun ke mab.hūt huī jaatī hai duniyā saarī
sher likkhe haiñ ki ejaaz kiyā hai maiñ ne

rahne ko ghar bhī mil jaatā chāk-e-jigar bhī sil jaatā
'jālib' tum bhī sher sunāte jā ke agar darbāroñ meñ

sher būñdeñ bane ġhazal dhārā
fikr-e-'sābir' ravāñ-davāñ bhī to ho

ab taur kī to apne 'jur.at' ġhazal sunā de
dekheñ to is ke hoñge sher intiḳhāb kyuuñ kar

maraz-e-ishq meñ asar hogā
merā har sher vo davā jaane

sher mere haiñ go ḳhavās-pasand
par mujhe guftugū avaam se hai

vo baat zehn meñ jis se kuchh intishār sā hai
vo baat sher ke sāñche meñ Dhaltī jaa.e hai