Tags-Sher

merā har sher haqīqat kī hai zinda tasvīr
apne ash.ār meñ qissa nahīñ likhkhā maiñ ne

Duubā hai bahr sher meñ aisā 'navā' ki ab
de tab.a ko fishār to mazmūñ Tapak paḌe

choTī ke sher tū ne kahe is zamīn meñ
sach hai 'vasīm' terī tabī.at balā kī hai

kabhī vo sher-o-suḳhan kā shaidā kabhī vo tahqīq kā divāna
vo merī ġhazloñ kā husn-e-matl.a mire maqāle ke baab jaisā

sher-dar-sher biThā.e ga.e masnad par sher
yuuñ sajā dī ga.ī bārāt mire lafzoñ kī

ek hasīñ fir.aun ko bazm-e-sher-o-suḳhan meñ
merī ġhazloñ kī pustak taurāt lagī hai

sher kahtā huuñ to 'akmal' mirā dil kahtā hai
fikr-e-āvāra pe alfāz kī chādar na chaḌhā

ye ġhazal apnī mujhe jī se pasand aatī hai aap
hai radīf-e-sher meñ 'ġhālib' zi-bas takrār-e-dost

ye khulā na ham pe ki tū kahāñ mai-e-sher pī ke nikal gayā
tujhe yaad karte haiñ 'arsh' sab kabhī phir bhī bazm-e-suḳhan meñ aa

mere har misre pe us ne vasl kā misra lagāyā
sab adhūre sher shab bhar meñ mukammal ho ga.e the

gadā-e-kū-e-suḳhan aur tujh se kyā māñge
yahī ki mamlikat-e-sher kī ḳhudā.ī de

maiñ ne ġhazal kahī hai 'munavār' magar kahāñ!
pūchhegā 'rāz' kaun! miyāñ sher kuchh kahe?

jā paḌe chup ho ke jab shahr-e-ḳhamoshāñ meñ 'nazīr'
ye ġhazal ye reḳhta ye sher-ḳhvānī phir kahāñ

mirī bāteñ jīvan sapnoñ kī mire sher amānat nasloñ kī
maiñ shaah ke giit nahīñ gaatā mujh se ādāb nahīñ hotā

hai us ke naam kī maalā mire laboñ kā subū
maiñ us ko sher sunā.ūñ vo gungunā.e mujhe

rañg paatā hai mire ḳhūn-e-jigar se gul-e-sher
sabza-e-fikr mirī aañkh se nam letā hai

sher 'ġhālib' kā nahīñ vahī ye taslīm magar
ba-ḳhudā tum hī batā do nahīñ lagtā ilhām

ai 'mus.hafī' tū aur kahāñ sher kā da.avā
phabtā hai ye andāz-e-suḳhan 'mīr' ke muñh par

ye sher-o-fan ye mai-o-naġhma ye shabāb-o-rabāb
ye baḳhshisheñ haiñ ġham-e-zindagī bhulāne ko

ik aisā vaqt bhī aatā hai chāñdnī shab meñ
mirā dimāġh mirā dil kahīñ nahīñ hotā